娛樂專題：黃心穎計劃35歲結婚生B

有份演出無綫台慶劇《東坡家事》的黃心穎首演古裝劇，飾演刁蠻又粗魯的角色，說話口直心快，又經常郁手郁腳糟質王浩信。心穎謂角色男仔頭與現實中的她很相似，故演繹起來容易上手，反而到後期角色成長，演繹起來有一定難度，她說：「自己好鍾意古裝，今次對白都係白話文，係要注意行路斯文啲。」

唔再大癲大肺

黃心穎再與傳緋聞的王浩信合作，她坦言經過《再戰明天》後更有默契，拍攝起來也更容易。對於與人夫王浩信的緋聞，心穎坦言有認真地自我檢討，她說：「大家係friend，大家知咩事，合作唔會尷尬。不過，自己都有諗過點解自己咁多緋聞，因為真係唔開心，係咪性格有問題？可能我喺外國長大，成個男仔頭，一向冇乜嘢，但去到工作上就出咗問題，自己係公眾人物要避忌少少，唔好玩得咁癲，唔會再大癲大肺，自己都有改善嘅。」

心穎角色恨嫁恨到出面，但現實中自言單身的她卻不心急，也不擔心緋聞嚇退追求者，她說：「依家覺得可以兼顧拍拖加工作，依家唔會抗拒，有人追嘅，但唔啱啫，以前希望25歲前結婚，依家覺得未長大，希望35歲結婚生BB。」

話歐陽震華似老竇

心穎劇中飾演歐陽震華的妹妹，還與萬綺雯有不少對手戲，心穎覺得很幸運遇到兩位好前輩，她說：「完全冇壓力，未開拍已經好有親切感，我爸爸同Bobby好似樣，估唔到Bobby話佢睇電視覺得好似佢妹妹，所以做兄妹好容易，佢可能係最容易相處嘅前輩。萬綺雯又好識照顧人，喺橫店有場戲，佢驚我凍幫我準備咗好多暖包、電暖背心，好似有媽媽喺身邊，好感動、好感激，感覺大家好似親人咁。」