無悔離開無綫　陳國邦唔排除食回頭草

最近向無綫公開寫「劈炮信」的陳國邦到電台宣傳舞台劇，表示將在十二月到廣州等地巡演，問到可會放假慶祝聖誕節？他指自從加入娛樂圈後，對節日已沒有強烈的慨念：「結婚周年唔記得，連老婆（羅敏莊）生日都記錯，仲要我嘅車牌係佢生日日子都可以記錯。好彩佢都係娛樂圈嘅人，佢會明白，覺得冇所謂，老生常談講句，平常過日子緊要啲。」

對於無綫近日內部有變動，阿邦表示：「直頭恐怖啦，我個心態都幾得意，會諗如果我仲喺入面（無綫），會唔會驚呢，如果我相熟個監製畀人炒咗，我都會幾驚。」

將在下月約滿的他又指認為在這個時候離開無綫走得合時：「風浪大，我行開吓，可能風浪冇咁大，又會有另一番景象。」他又坦言不排除會吃「回頭草」：「有啲同事走嗰時鬧到七彩，最後咪又係返番去，無綫只係個品牌，始終由人去運作，主席都換咗幾個啦，隨住權力交替，好多情況會發生。」