介意被指「小豬第二」　小鬼爆感情變淡

台灣藝人黃鴻升（小鬼）最近出新專輯，今日喺台灣舉行MV首映，出道以嚟一直被指似羅志祥（小豬）嘅佢，今日受訪再被問，係咪介意被指「小豬第二」？小鬼就直言：「我介意！」之後小鬼再解釋，話唔介意被人話佢似小豬，亦都唔介意模仿小豬，但就好介意被話係「小豬第二」，又話：「因為我是黃鴻升。」亦承認想擺脫（小豬影子）！

小豬同小鬼感情好，喺圈中公認嘅好兄弟，但小鬼竟自爆兩人感情大不如前，雖然話喺工作會一齊係好朋友，但私下就唔會一齊玩，更解釋係因為興趣同想法都唔同！而小鬼曾經係Party boys成員（小豬私下玩樂組合），但喺五年前發現，小豬同其他人出去都唔會叫佢，而當小鬼問番小豬，小豬都只係話佢諗太多！