陳慧嫻預告性感開騷：要死跳爛跳！

歌手陳慧嫻出席明年三月舉行兩場演唱會記者會，會場放有兩對靚喇叭不停播放慧嫻本月十九日推出的Hi Fi專輯，席上慧嫻收到主辦單位之一的耳筒及贊助商巨型紫菜禮包。

慧嫻透露今次個唱要挑戰難度，希望穿Deep V露胸骨及鎖骨，又表示個唱中有百老滙形式及民族音樂，並笑說：「每Part都要死跳爛跳。」最後透露舞台是鑽石型三面台：「背景有好多視覺效果。」

目標減到九十幾磅

慧嫻受訪時表示一直有入紙申請紅館檔期，她說：「上次完成30週年演唱會，一直希望開Part2，紅館一路冇期，依家申請到又同上次隔好耐，所以做全新演唱會。」問到是否真的以Deep V示人？慧嫻說：「我肥得好均勻，依家一百一十幾磅，目標可以九十幾磅，都係講吓笑，要突然有事業線都幾難，想性感少少有女人味。（馬甲線？）老實講對觀眾嚟講係Bouns，入場嘅觀眾都唔係睇呢啲。」由於跳足整個演唱會，問到擔不擔心會腳軟？慧嫻說：「唔怕，只係驚記唔到舞步，所以今次要提早啲排舞。」