學歷受質疑　蔡思貝今日向公司交代詳情

2013年香港小姐亞軍蔡思貝被指當選後報讀了一間海外大學學士課程，但申報入讀時間卻是2010年，並在一個月內完成課程，與她於2010年於德國留學的時間重叠，蔡思學歷備受質疑。昨日她回應時稱要了解事件避談事件。

蔡思貝下午四時許繼續為無綫劇集《味想天開》開工，問到對於被質疑學歷了解得怎樣？她說：「了解咗啦，今日上咗去見公司，同公司交代、講清楚，依家交畀公司處理，因為都大件事，工作以外就唔回應。（公司有咩反應？）公司清楚了解咗件事。（公司點處理？）唔知，交畀公司處理，睇下點做。（公司了解完會唔會交代你究竟有冇讀過？）公司要睇番先再作決定。（同公司交代咗啲咩？）同公司交代清楚，工作以外嘅嘢唔講。（屋企人有冇擔心？）有，同佢哋講叫佢哋唔好擔心，依家日日都開工拍劇，自己專注劇本、拍劇。（擔心影響形象？）都會，因為出晒報紙，但係會忠於自己，努力工作。（擔心點解唔作出澄清？）等公司安排。（究竟有冇讀過嗰間大學？）除咗工作，其他都唔回應。（擔心坐監？）冇諗到咁遠。（會唔會因事件瞓唔着？）唔會，當你凌晨收工就唔會瞓唔着。（工作安排有冇變？）冇，依家keep住拍劇。（同事有冇關心你？）台前幕後都好關心。」