藝人陳松伶出席自家內衣品牌活動，大會還播放身在內地拍戲而未能現身支持的老公張鐸，預早準備的一段恭賀開幕短片，令她大為感動！其後她介紹內衣品牌外，並笑言必須要Show off下，隨即惹來一陣哄動，更作狀脫衣說：「大家唔好影。」

幫家人換晒衣衣

她接受訪問時，被問到是否真的有準備脫下外套？她表示是說笑：「內衣唔係一件可恥同猥瑣嘅事，係可以改善體形，3秒可以減磅，體形變到人見人愛，健康好緊要，着啱嘅內衣唔會壓抑到乳線同淋巴，加上我個人好男仔頭，都會諗點會同內衣掛勾到，但其實內衣同健康息息相關，所以我都同屋企人換晒啲適合嘅內衣，將健康和幸福嘅訊息傳開去，所以先叫內衣文化，同埋我嘅內衣唔係講有幾強同幾性感，只係想帶健康訊息畀大家。」

讚老公有忍耐力

問到是否會長期留港？她說：「好多時間會，呢度好需要時間，我成10點放工，3、4點先瞓，因為我好心急去話畀大家知。（咁咪少咗見老公？）少咗好多，但航空公司應該好多謝我哋，因為成日兩地飛，我覺得虧欠咗佢，佢精神同金錢上都好支持我，仲好有忍耐力，一段健康婚姻點可以3個月唔見，所以我一有時間都會返去探佢，加上我喺北京、上海都有好多嘢要處理，我係打雜嚟。」

生B順其自然

她又指品牌與「美容教主」鄭明明投資了7位數字，又謂對方是自己的前輩：「佢10幾、20歲就開始着，我都想將來可以好似佢咁美好，所以依家要節制。」更透露在內地開分店是自己的目標，而春節將會陪老公返老家度歲：「已經book定期。（會唔會生bb？）呢個已經係我嘅大bb，嘩嘩叫嗰啲就唔知，順其自然。」