網民熱話：台慶爆笑位逐個捉
20151120
東網電視
更多新聞短片
台慶3大必睇位，咪走雞！
無綫一年一度嘅「重頭戲」《萬千星輝賀台慶》尋晚圓滿結束，台慶夜除咗可以睇到一眾「胸」前偉大嘅女星以盛裝出席，令畫面賞心悅目之外，當晚嘅節目亦十分精彩。好似其中有一幕，曾志偉喺台上盤點一眾視帝大熱嗰陣，講到「三年抱三」嘅陳豪，志偉就話：「你成日都好似好眼瞓咁，你做咩呀？晚晚攪嘢呀？」惹嚟全場大笑！之後，志偉就補番句話：「攪奶粉啫！」而講到黃宗澤（Bosco），志偉更加抵死話：「一睇你個樣，就知你畀女飛啦！」而當晚最爆笑，就要講到單立文同李思捷重演「謝賢摑曾江」一幕！個個網民都話：「呢段真係精彩！」
首先，扮演「奀江」嘅李思捷食住蛋糕出場，之後扮「謝老四」嘅單立文就跟喺後面，用一把同謝賢接近一模一樣嘅聲問佢：「你隻腳好番喇咩？仲食蛋榚！我碟滷味呢？」之後思捷就話：「未好番都可以食架嘛，老四呀！」然後單立文就一把打落去思捷度，話：「Happy你個Birthday吖喇！」全場再次爆笑！
唔少網民都話估唔到佢哋兩個可以扮得咁似，無論外形、動靜、聲線都似到十足十，真係唔寫個服字都唔得！當Dodo問到：「呀，老四，嗰日幾百萬對眼見到你打佢架喎！」之後佢哋兩個繼續搞事，思捷話：「打？好多人都打架啦！唐詩詠同洪天城（洪永城）都成日打啦！」單立文：「蕭正楠同翠如BB夠成日打啦！」思捷：「打乜嘢呀？」單立文：「打飛…滋呀」思捷：「仲有打咩呀？」單立文：「打…打野戰呀！」嘩！尺度咁大嘅？全場立即嘩然呀！之後思捷即刻補飛話：「係War Game…War Game呀！」
另外當晚另一亮點，就係台慶大獎畀一個大家都有啲陌生嘅面孔贏走咗，佢就係華姐出身嘅于淼（Maggie），之後網民仲發現，原來Maggie有份演出過《鬼同你OT》同《愛．回家》架，唔少網民都讚佢係靚女一名添！
網民有話兒：
Sax Wxx：一聽距（佢）講老四真係勁似！
Melxxx Lxx：佢口快快講左（咗）真心說話：「去打⋯打野戰呀」
Aaxxx Chxx：好正啊曾志偉！係佢講先特別爆
Carxxx Poxx：頭先我真係以為係四哥（謝賢）…哈哈洪天城？洪永城加洪天明？
Natxxx998：笑到我流眼水…好慘啊…潤佢（指黃宗澤）俾（畀）女飛喎！
「東網巨星」fb專頁：
每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。