愛與女友selfie　周柏豪未必操刀結婚相

歌手周柏豪（Pakho）與蔣雅文出席攝影展，Pakho接受訪問時，透露幾年前有媒體問到他是否已經結婚：「因為查到都係有個叫周柏豪、又係住將軍澳嘅人結咗婚，我已經否認咗，原來係另一個周柏豪，不過今次因為做呢個活動，而同當年呢位周柏豪相認，佢係一個出名嘅攝影師！」更笑言係同「世界上另一個我」相遇。

自爆愛與女友影selfie

問到熱愛攝影的Pakho平時可會叫女朋友擔當模特兒，他指自己除外拍攝都很低調，而且跟女友拍照多數都是selfie。至於談到何時跟對方拉埋天窗兼親自操刀影結婚相？他笑言還沒有計劃：「可能全部都係大頭相！其實自己平時拍嘢都有好多意見，而且好高要求，所以可能會邀請好熟嘅朋友影！」

用影相挽救婚姻

另外，蔣雅文表示今次跟另一位女攝影師合作，事前兩人不准用文字交談，只能上傳相片溝通，從而得出今次的作品。蔣雅文透露自己自細已喜歡攝影，但因將工作及家人放第一位，所以將攝影放低一段時間，不過因去年拍攝又重拾興趣。問到她可會找老公做模特兒？她笑言：「我依家就鞭策緊佢，佢對影相一竅不通。我以前成日幻想伴侶就算唔識影相，都要係個鍾意影相嘅人，所以依家要用影相去挽救婚姻！」她再指要幫老公上攝影理論堂，而且影相時亦要就角度，因對方中年發福有大肚腩。