娛樂專題：曾詠欣堅持「黑暗」殺入樂壇

樂壇新人曾詠欣（Nicola）不扮清純可愛，誓要用「黑暗」殺入樂壇，化身為最Dark新人，目的是要在「大染缸」中保留最真實的自己。

新人歌手曾詠欣甫出道便以一曲《永遠的愛麗絲》化身成「暗黑系公主」，以黑色童話風格進軍樂壇，將原本天真爛漫的愛麗絲改寫成一個寂寞，但不懼怕黑暗的勇敢女孩。自言向來Dark Dark哋的Nicola表示，第一首派台歌的內容猶如將她寫進歌裏：「我一直都係黑黑哋，但唔會因為咁逼死自己，寂寞又點？就算活喺自己世界，平日都可以天馬行空。」談到甚少新人會以黑暗一面出道，她笑言這應驗了經理人當初所說的「預言」：「公司話我除咗呢個風格冇其他，又做唔到純情，又冇可能可愛，結果就做番最真實嘅我。」

雨傘紋身紀念重生

Nicola透露這個比較黑暗的她其實源自學生時代在外國生活的兩年：「一年去咗澳洲，一年去咗英國，但我唔似係去讀書，因為我覺得嗰兩年入面學到最多嘅唔係學業，而係令我性格變得獨立。」她又笑言因為是家中孻女，自小集萬千寵愛於一身，故亦養成了公主病，但兩年的獨處時間反而令她學懂解決問題，成功蛻變成無懼黑暗的獨立女孩。為了紀念這個「重生」的自己，她更特地在左腳紋上外黑內晴的小雨傘：「呢把遮係我上網見到，外面全黑，入面係一個藍天，好代表到我，因為無論出面幾風大雨大，活喺自己世界都係晴天。」Nicola更希望這個紋身能提醒自己堅強，任何事情都可以跨過。

拒入行險錯失良機

最近不斷出席宣傳活動，Nicola開始感受到歌手的身份：「頭半年都未知做緊咩，好多嘢都冇接觸過，又唔熟悉，直頭唔敢相信係歌手。」她透露當初在機緣巧合之下與經理人相遇，更曾拒絕入行：「有次喺澳門酒吧唱歌，有人問我有冇興趣錄音，當時我冇理到，因為嗰啲場合你唔會信係真。隔咗一個月，依家個經理人喺同一間酒吧出現，問我同一個問題，又同我講咗一番勉勵嘅說話，之後我就諗：『唔通上天都想畀個機會我？咁不如試吓啦！』」她又笑言喜歡唱歌全因從小受爸爸影響：「依家好似幫佢圓夢咁，父母會畀好多意見我，新歌出咗之後，佢哋就開始喪Loop我首歌，又Cut咗嚟做鈴聲。」

Nicola雖然以歌手身份出道，但未錄第一首歌已參演了一套鬼片：「我喺戲入面做一隻鬼，本身係個援交妹，但畀Eric Kwok殺咗，再利用人幫我搵番條屍。」她表示起初知道試鏡成功時覺得受寵若驚，不敢相信作為新人也有機會參演，又覺得拍鬼片很好玩，本身怕睇鬼片的她更超享受嚇人的過程。