鍾嘉欣重提被「追殺」經過：我以為會死
20151123
東網電視
更多新聞短片
鍾嘉欣重提番當年拍無綫劇《人生馬戲團》被「追殺」嘅經過！
藝人鍾嘉欣擔任嘉賓的無綫節目《娛樂3兄弟》昨晚播出，其中一部分嘉欣首度講述十年前在內地拍無綫劇《人生馬戲團》失蹤的經過，再度炒熱這話題！2005年8月，鍾嘉欣和楊思琦、陳浩民、唐文龍在番禺拍攝《人》劇，期間他們與工作人員唱K消遣，傳出被當地賊人打劫，更傳出楊思琦和鍾嘉欣失蹤多個小時，事後無綫高層勒令相關人士封口，多年來引來外間不少揣測！
「我覺得我哋死梗」
嘉欣在《娛樂3兄弟》重提此事，她說：「依家都過咗十年，我哋冇失蹤72小時，但發生咩事，到依家對我嚟講都係一個謎嚟嘅！」她透露當日是8月7日思琦生日，她希望為對方舉行驚喜Party，唐文龍提議到相距只有五分鐘路程並且相當安全的卡拉OK，於是嘉欣叫唐文龍及陳浩民安排，嘉欣再說：「唱到一點幾左右，大部份人都走晒，淨係我哋10個人一齊走，我最心急，行到最前截的士，一開（的士）道門，有十幾二十個男人，拎住咁大把圓月彎刀跑過嚟，閃令令，我最前睇得最清楚，佢哋舉起手講『別走』（用普通話）！我覺得係追殺我哋，追到掘頭路，我覺得我哋死梗，但唔知點解有啲磚疊到咁高嘅，有啲垃圾又係疊到咁高，又有啲樹枝，寧寧舍舍有咁大個窿喎，我就話『思琦！跳！』我喺啲窿罅度見到佢哋隻腳，拎咗啲電筒照住想搵我哋，嗰下真係好驚，我真係以為會死！」
聽到的士開門聲都驚
其後助導致電嘉欣，表示「壞人已經走咗」，但嘉欣依然相當害怕繼續匿埋：「佢愈講呢句我就愈驚，我諗會唔會一走出嚟就即刻捉我，最後我冇出嚟，又鎅損咗隻腳，最後佢搵到我哋，之後我係咁爆喊，嗰次之後真係有創傷後遺症！」她表示每次聽到的士開門聲及鏗鏗聲便會感到害怕甚至爆喊，壞情緒維持了約一年半才平伏。問到知否被追殺原因，嘉欣說：「我當係點錯相。」
「東網巨星」fb專頁：
每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。