唔急開鏡拍攝　林峯120%投入工作

藝人林峯現身深圳出席珠寶店的開幕剪綵，現場圍觀者逼爆至三樓！有近千人到場一睹林峯的風采，林峯在台上講到近期為新歌錄製MV，又透露第一首MV將在12月推出，問到明年的演唱會，他則大賣關子：「已經同導演開咗幾次會，大方向都定咗，服飾就仲揀緊。」

到問答環節，有粉絲問到林峯在大銀幕和電視上何時有新作？他表示：「事情要一件一件嚟，我認定要做一件事情嘅話，就會放100%甚至120%嘅專注去處理，依個係對客戶、粉絲仲有觀眾嘅尊重。」及後，林峯又即場抽出觀眾幸運兒上台大玩遊戲，並親自為粉絲帶上名貴首飾作禮物。