湛琪清幫汪詩詩湊仔　準備好做媽媽

「宇宙最強」甄子丹太太汪詩詩表妹湛琪清出席活動，透露詩詩去了倫敦探子丹班，所以她幫忙照顧其子女，她說：「佢哋好少有機會兩個人一齊，好少二人世界，今次會去一個星期。（咁你要做保姆？ ）我好鍾意，啱啱先同佢哋去咗迪士尼。（有冇同埋圓圓個女？）冇，佢太細個。（佢哋百厭嗎？）James（詩詩仔仔）好乖。（有冇被激親？）有時叫佢食菜佢唔肯食，同埋有時功課唔肯做，但佢其實好聰明。」

至於問到她是否已準備做媽媽？她笑說：「我都好多準備，有段時間我都要睇住佢哋，要同佢哋講故事，講完又講，但我自己都鍾意小朋友，所以有緣份到都OK。」問到圓圓現在情況如何？她續說：「佢個肚依家好大，兩個都開始踢佢，人哋三年抱兩，佢就兩年抱三，好犀利！（佢係咪肥咗好多？ ）都OK，今次反而比上次瘦咗，我覺得佢佗得好靚，不過就好辛苦。」