錯生肖捱轟　玲玲寸安志杰：又唔係李連杰

堪輿學家麥玲玲出席蔚雨芯（Rainky）迷你音樂會，談到早前舉行的《萬千星輝賀台慶》環節「台慶送大禮」，因她提早離開現場關係，需要再抽另一位藝人補中一百萬獎金，最終抽出由于淼補上。玲玲坦言一早知會大會早走，她說：「已經叫佢哋唔好擺我名入去，真係陰差陽錯，從來都冇試過抽中獎，冇乜偏財，只係中學嗰陣抽中代表學校出去考試。（覺得唔抵？）唔會，我又唔係正式藝員，于淼都話請我食飯，佢係後輩，等我啲前輩請啦。」

暗寸安志杰

至於早前因記者畀錯資料，搞到誤以為安志杰生肖屬龍，直指對方與Jessica C.唔夾，令對方怒髮衝冠叫她「轉工」，玲玲對此表示：「其實係記者畀錯資料我，記者都係網上搵佢個生肖，跟資料啫，好多時都會錯。」隨即暗寸對方不是李連杰：「佢只係安志杰唔係李連杰，錯都唔奇吖，可能嗰時佢結婚，我唔係恭喜，佢唔高興，但我係以命論命，唔係睇你係邊個，我之後都話，如果佢個BB出世要改名，歡迎搵我。」

嬲爆：得意咗啲咯

問到是否覺得安志杰小氣？玲玲說：「好難講，得意咗啲囉，如果係我會用幽默方式表達，可能佢真係好唔高興屬龍。」