苟芸慧想做全職賽車手　未ready再拍劇

藝人苟芸慧出席活動時，提到早前於澳門參加賽車卻因壞車而未能出賽，她腳背上亦因練習而有瘀傷，對此她說：「呢啲係開心背後嘅代價，無得落場比賽都有少少失望，不過凡事睇兩面，可能我落場嘅話會有意外，依家贏返條命。我始終係賽車場上嘅BB，希望下次可以再出賽。自從呢次出事後我真係鍾意咗賽車，沉迷咗，會再上啲course同埋要加強訓練先再去比賽，想代表香港。（想做全職賽車手？）希望，不過我知無辦法可以做到，有工作在身。拍劇嘅話暫時我身體都未ready好，嚟緊會做個賽車嘅節目，好surprise，公司每次畀機會我都會盡力做好。（想唔想識個車手男朋友？）好難，因為個個都笠住個頭，唔知佢咩樣。（喺車場上有無人同你搭訕？）無，因為我都笠住個頭。不過都識咗一班鍾意賽車嘅朋友。（無啱心水嘅？）佢哋個個心入面都係得車，車係大婆，我接受唔到做二奶。（將來嘅對象一定要將你放喺第一位？）老公一定要啦，男朋友就無所謂。」

唔急再拍劇：依家車係我嘅第一位

她又表示不急於拍劇，拍劇就如拍拖一樣不能心急，要講timing。她現在沒有拍拖也沒有追求者，她會靜待緣份的安排，她說：「依家養好身體先，都要個樣靚番先，單身都幾好，我又有好多girl friends。依家車係我嘅第一位，等我做咗人太太之後先調番個次序。」

自爆曾遭醉漢錫

另外，問到金剛涉捲入台北夜場槍擊事件，她說：「我知佢講咗話唔關佢事，希望佢個人平安就得。」而提到鍾嘉欣等人十年前遇襲一事，她就謂很多人飲醉酒都控制不到自己，她也會避免讓自己置身危險環境，就算去夜場都是朋友邀請，她信得過朋友才會去。她之前到巴西拍世界盃節目就試過遭醉漢吻了一下。

「東網巨星」fb專頁：

每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。

http://www.facebook.com/onccstars