周麗淇撻着迷彩男　摸黑上樓三粒鐘

36歲女星周麗淇（Niki）今年9月初被爆已與拍拖兩年多的內地小生徐正曦分手數個月，Dry足半年的她終於再遇春天。近年專注內地發展搵真銀的Niki，百忙中仍抽空返港經營愛情，宣告單身後極速回勇的她早前被拍得夜會潮男，摸黑上樓開餐共聚三粒鐘「洩蜜」。

「蜜」會三小時

當晚約8時半，Niki駕車到北角後，留於車廂近15分鐘未有落車，只頻頻低頭撳電話似在等人，隨後一名身穿迷彩衫的潮男行近其座駕，Niki即嘴角含春面露甜笑，大騷招牌笑眼冧爆落車，與潮男有講有笑。他倆同行至街尾，Niki化身跟得女友含情脈脈望實潮男泊車，不施脂粉的她仍顯容光煥發。待潮男泊好車後，再並肩行至黑漆漆的後巷，摸黑傾了一輪，再鬼祟上樓撐枱腳。

「蜜」會近三小時後，他倆才一同步出後巷，往取車途中雞啄唔斷，潮男講到興起時不禁手舞足蹈，Niki則耐心做聆聽者，又不斷給反應，可見二人勁啱嘴形。沿途Niki與潮男愈行愈Close，手背碰手背，又一度意欲翹手，曖昧動作更顯親暱，期間見有途人走近，即彈開數個身位，之後再邊行邊講往取車，才依依不捨各自離開。

微博只談工作

自與徐正曦甩拖後，Niki專注內地拍劇，活躍於微博的她亦只貼出工作動向，連月來的留言不外乎是「又誰比我更早開工」、「努力拍攝中」及「第一次拍攝3D電影，感覺震撼！未來真是科技時代！」等有關工作的字句，與合作的男演員即使合照亦顯得較避忌，只在月前被指搭上內地富豪，惟戀情只是空穴來風。已屆適婚年齡的Niki，今次相約潮男甜蜜撐枱腳，看來亦是為終身幸福着緊，相信好消息很快便公布。

「東網巨星」fb專頁：

每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。

http://www.facebook.com/onccstars