【勁感人】王父不捨王菀之　唔肯將手交Eric

恭喜、恭喜，王菀之（Ivana）正式成為「蘇太」，戴上頭紗及穿上婚紗的Ivana行長樓梯落樓，Ivana翹着爸爸進場，王父將囡囡交畀女婿Eric So（蘇卓航）時，未知是否不捨得遲遲未肯將囡囡手交給新娘哥，現場賓客即起哄問王父：「係咪唔捨得呀？」王父直認：「係呀，我唔捨得。」最後，Eric So主動搶新娘，一對新人雙眼通紅攬實王父，場面感人，接住進行宣誓及註冊，王媽媽即席獻唱，並朗誦親自作給一對新人的詩。

西式婚禮襯中國嫁女音樂

一對新人先交換戒指、合卺交杯及切蛋糕，全程情深對望，期間又再次起哄：「咀佢、咀佢。」一對新人應要求連咀兩次，男方表現得相當肉緊，雙手摸住「老婆」塊面。雖然現場採用西式婚禮儀式，但期間奏起中國嫁女音樂，原來一對新人堅持用中西合璧，亦向雙方父母跪地斟茶，然後一對新人在牧師見證下兩人終成為合法夫婦。王父送上品牌手錶給女婿Eric So，而王母則送上一對龍鳳鈪及巨型玉吊墜給囡囡Ivana。

及後一眾賓客拉實一對新人玩自拍，其中軒仔向Ivana詐嬌說：「哼！依家兩個老公同妳影張相啦。」身旁的黃偉文插嘴說：「哈，唔知邊個係老公呢？老公競選比賽。」