試新嘢！KillerSoap想喺高速公路旁開騷

樂隊KillerSoap現身旺角街頭舉行音樂會，大唱多首搖滾歌曲，吸引近百粉絲和途人停下欣賞，現場氣氛high爆！

會出席頒獎禮

受訪時，KillerSoap表示是首次在貨車上演出：「之前有喺飛機，撐船，都想試吓邊行邊唱，可能喺Highway（高速公路）側邊開，總之想試好多新嘢，大家如果有idea都可以同我哋講！」提到年尾樂壇頒獎禮，他們表示將會出席：「去識吓朋友。（唔諗住攞獎？）冇得諗嘅，反而見到咁多樂隊一齊，大家會好好傾。」五子又謂即將籌備全新廣東大碟，預計明年中推出。

搵婚禮場地

而主音陳樂基（Rocky）早前向女友求婚成功，問到何時舉行婚禮？他說：「定咗出年年尾。（一邊籌備新碟一邊籌備婚禮？）都係，同埋我出年年尾先結婚，我依家搵場地，周圍都冇晒位。」有成員就搞笑叫他在貨車或高速公路舉辦婚禮，Rocky笑說：「唔得，一生人一次，我肯我老婆都唔肯！」問到他太太心目中的婚禮？他透露太太希望普普通通，只有他們兩人的婚禮：「不過好多同年紀嘅人都係咁，搞婚禮係搞畀父母，好多父母都會幻想仔女結婚係點。」