冧笑談新歡寸舊愛　城城唔排除閃婚

天王郭富城（城城）於中環出席活動，自昨晚公開戀情後首度現身的他，現身時滿面風騷，當記者表示「恭喜晒」時，他回答多謝。談到得獎感受時，城城似是為感情問題有備而來，並謂：「生活方面大家都知最近發生咩事，大家睇住我成長，以前感情低調，依家想換新方式，希望得到大家認同同祝福，將來嘅事無人知。（所以想公開？）唔同階段都想成長改變，現階段公開唔影響工作。（認定？）唔係想睇番以前，每個人都有過去，想改變生活方式。（拍咗年幾？）冇。（一個月？）一個好短時間。（咩吸引？）將來話你知啦！（話女友好嗲）私人嘢就唔講喇！（點識？）朋友嘅朋友，食飯識。（張智霖介紹？）唔係，大家唔好誤會，唔好執着幾時，邊度食飯識，相識好開心，希望得到大家祝福。（結婚？）將來無人知，公開對我依家嚟講係適合，另一階段。（想畀女友安全感？）唔好咁複雜。（機場被圍嚇親女友？）記者不嬲都好熱情，自己私人生活低調，男人有責任保護身邊朋友。（六日玩咗咩？）咁又要專訪喎！（年齡差距？）相處唔關事，睇心靈同興趣，發掘共同思想，年齡唔係問題，加上我都唔似啦！衰鬼。」

問到會否閃婚，城城似不排除：「交畀個天啦！（想成家？）希望過去咗就過去咗，用呢種方式認識對方，慢慢去發展，公開係想坦白同誠實。（公開拖手？）拍拖都好正常嘅。（以前又咁低調？）每個人都經歷過啲嘢，依家想改變，希望大家支持。（了解女友過去？）每個人都有過去，唔能夠數算人。（想結婚？）大家真誠去發展。（叫你老公仔？）係咩？（叫番佢豬豬？）咁又要專訪喇喎！」說時，難掩一臉冧爆。

暗寸舊愛：生活唔係戰場

談到王思聰認方媛是舊愛，城城即表示唔回應：「每個人都要學識尊重對方，都有過去。」當談到舊愛熊黛林（Lynn）送祝福時，城城表示當然會，問佢現在幸福嗎？他表示：「我希望所有人都幸福。」再有人追問關於熊黛林問題時，城城即表現猶豫，良久想不出答案，此時小美即表示「係咁多時」，城城突然彈出一句：「我諗到喇，我有一句嘢一定要同大家講，生活唔係戰場，唔需要一較高下。」

緊貼娛樂圈消息嘅《東網巨星》App，於《東網巨星》facebook推出《東網民選TV King & Queen》投票活動。首日投票競爭激烈，想心水藝人獲得佢哋應得嘅民選視帝、視后，就快啲去以下兩個專頁投票啦！

投票連結：

「東網民選TV King」專頁 http://goo.gl/LKnaWu

「東網民選TV Queen」專頁 http://goo.gl/HXMu7J