陳海琪遭保安夾走　森美：唔覺佢有醉

藝人森美與歌手林欣彤、黎曉陽出席應用程式設計頒獎禮，是次活動為關注有專注力不足等學習問題的小朋友，而森美亦在活動上透露自己有專注力失調，受訪時問到專注力失調有否對工作造成影響？他坦言：「有㗎，特別係有情緒病嗰陣將專注力問題更誇張，所以先睇醫生。」他表示身體猶如有種力量令自己很想動起來難以集中，而他做家長後更加關注問題，他認為若子女有類似情況要體諒其情況：「以前我要瞓喺度先讀到書，而我發現用聽覺聽會易入腦，所以我會錄低自己要讀嘅書再聽。（小朋友讀書方面難唔難教？）細個已經同佢哋Check，因為有遺傳，好彩佢哋就冇。」

囝囝無畫生日卡感失望

談到日前生日的森美如何度過？他表示與朋友慶祝，已吃了四、五個蛋糕，笑言除大了一歲也大了一個碼：「夜晚同媽咪食，因為佢生我出嚟，係重要過我生日。（仔女送咗咩？）個女畫咗幅畫畀我，仔仔就冇，我問佢點解佢話要練大提琴同做功課，我心諗呢個自己惹下的禍，苦爸爸要小朋友練太多而生日卡都冇時間畫，都要反省吓。（失望？）有啦梗係！」

至於日前陳海琪擔任活動司儀被保安「夾」離場，當晚在現場的森美表示：「唔覺佢有醉，中間有交接位，佢同我講啲嘢係好清晰，係可以把持晒，我唔知後面點，但佢問嘉賓問題都恰當，同埋佢係前輩，訪問都一針見血，佢又同歌手熟，係家常便飯啫。」