古惑仔零下15度開騷　後台打邊爐唔怕肥

「古惑仔」鄭伊健、陳小春、錢嘉樂、林曉峰（阿Lo）和謝天華的《歲月友情演唱會一起兄弟篇》內地巡唱已跑到第7站，由上海、南京、廣州、杭州、天津、哈爾濱到武漢，他們愈唱愈high，雖然上星期武漢站伊健感冒病倒聲沙沙，他曾經考慮取消演出，但獲4兄弟力撐，阿Lo說：「觀眾鍾意部電影而等咗20年，買飛入場支持，唔好令佢哋失望。」小春和天華異口同聲：「聲沙沙咪一齊唱囉！」結果伊健繼續站台演唱，表演順利。

餐餐打邊爐唔節食

哈爾濱一站，天氣僅得攝氏零下15度，經理人林珊珊知道5子都喜愛吃火鍋，神秘安排熱辣辣食物在後台，讓他們綵排後返入後台開心得打邊爐，眾人急不及待進食暖肚，平時為keep fit飲食節制的嘉樂也破戒開懷地吃，伊健更食到嗌熱要除衫，林曉峰笑言餘下的場數不多，提議之後餐餐打邊爐，即獲其他兄弟和議。

自認小鮮肉

首次踏足哈爾濱，5子都顯得特別興奮，伊健表示最想看冰雕，阿Lo則說：「以前經常有電視台工作嘅前輩話，拍戲拍到哈爾濱登台，好威風，今日我可以嚟到呢度開騷，好開心！」天華笑說：「有前輩話我知，喺哈爾濱開騷舞台都係冰，今天喺台上冇見到冰，因為被觀眾嘅熱情溶化咗！」阿Lo打趣笑觀眾20年前看他們的電影，跟大家一齊成長，大家都沒有老，他笑說：「請你哋發微博、喺朋友圈話畀大家知，我哋唔係大叔，係小鮮肉！」全場爆笑。