網民惡意中傷　李珊珊爆seed反擊

前一排網民好興開帖討論「一句說話撻着乜乜乜？」嘅話題，呢日竟然到前港姐冠軍李珊珊（Sansan）真係畀人一句撻着咗，昨晚佢上載一罐糖果嘅相之後同大家講晚安，竟然有網友惡意留言「又老又黑又醜」！畀吓面好喎，話晒都係前港姐冠軍吖，話晒美貌與智慧並重，畀人咁樣話法，啖氣真係好難吞。

之後Sansan決定唔瞓都要發文討回公道：「小女生，你我無仇無怨，跑過來口出惡言，試問事後你能有甚麼得益？聰明了嗎？身體強健？升職加薪？還是自動長高兩吋？互聯網或微博的存在，不是給我們這樣使用的，何必如此。好好專心學習你喜愛的跳舞，四處吃喝享受生活，和閨蜜談笑風生，並且不要助長自身的劣根性，那才不枉青春年少花樣年華。」好彩發完文之後得到其他網友安慰，終於可以安心瞓覺。