裸泳戲獲讚逼真　陳凱琳想同嘉穎一齊睇

藝人陳凱琳（Grace）、鄭俊弘及吳若希等等於荃灣，拍攝無綫節目《搵食飯團》。當中Grace笑言不用拍劇時，會立即參與《搵》的拍攝，因為可以大擦美食。

談到她日前出發日本拍攝劇集《巨輪II》，Grace透露當中與蕭正楠（Edwin）齊齊裸泳的戲份亦已拍完。她表示當時僅穿肉色bra及短褲落水拍攝，更自爆獲拍檔Edwin大讚效果逼真：「拍嗰時唔緊張，淨係好凍。不過已經打晒底，Edwin都話『嘩！好似（裸體）！』（佢裸得似唔似？）男仔好啲，平時上身無着都冇所謂。（有冇勇氣真係裸泳？）冇呀！」

談到她當時有否將「打底照」傳給男友鄭嘉穎過目「審批」？Grace笑說：「一早大家知呢場戲，到時劇集出街一齊睇。」

撐嘉穎攞視帝

提及即將舉行的《萬千星輝頒獎典禮》，獲三項提名包括視后及飛躍進步女藝員等獎項的Grace稱信心一般，但亦準備好優雅大體的粉紅公主裙於當日亮相。問到男友鄭嘉穎是否她的視帝之選？Grace就繼續為對方隔空打氣：「梗係啦！自己都認為佢係視帝，不過未知佢到時會唔會一齊行紅地氈。」