周麗淇愛抽姨甥水：錫佢成身

藝人周麗淇出席慈善晚宴，問到參與以夢想成真為主題的晚宴，自己的夢想成真了嗎？她表示已有很多事情都夢想成真了，說：「唔好太貪心。（結婚生仔呢？）結婚生仔唔係夢想，係人生嘅階段。（有冇時間表？）工作有時間表，其他嘢唔想刻意。（咁之前唔係同咗位男士去食飯？）嗰個係我生意拍檔嚟，佢都同我講搞錯，話『我都傳到（緋聞）』，我係同佢開會傾salon嘅嘢。（冇乜機會？）佢自己都喺微博講咗，用潮男型男算係抬舉咗佢。」

屋企無催結婚生仔

問到看見家姐周汶錡的仔仔如此可愛，自己會否加快速度？她說：「冇呀，屋企唔係第一次有小朋友，我哥哥之前有啦，咁我確實係好掛住佢（姨甥）嘅，返到嚟夜晚食完飯都會去睇吓佢起身未，佢一見到我就笑，平時都會視像吓，佢又好黐我，咁我同佢算少見，佢一見到我就好似話我返咗嚟咁，我又係咁抽佢水，抽到有啲過份，錫佢成身，好鍾意BB香味，所以唔使擔心我，屋企嘅Focus都喺晒佢度。（媽咪冇催？）佢叫我唔好生住，話『你生咗我都唔知點算』所以短期內唔會發生。（結婚都冇催？）冇畀壓力我，知我唔鍾意人畀壓力同催我，所以冇，依家OK呀，幾開心。」

唔怕過lonely Christmas

她又透露現時仍單身，說：「唔可以話係期待，但available，未有覺得有一個人覺得啱。（有冇追求者？）唔算係追求者，因為我冇乜製造時間機會，冇遇到有興趣嘅人。（即係拒絕咗好多人？）冇，朋友成日話帶單身男女出嚟一齊食飯，但我覺得冇乜話題，隨緣啦。（唔怕過lonely Christmas？）唔怕，好忙呀，又要做嘢又要family gathering，可能大家都驚我lonely，問我24、25日有party去唔去，我話唔好意思，唔喺香港，多謝朋友畀機會我，我仲諗緊去邊好。」