荷李活男星Simon Baker以代言人身份來港出席活動，在旺角街頭為浪琴表新店開幕擔任剪綵嘉賓並為醒獅綁絲帶，現場有大約100名市民圍觀。他還帶同14歲的細仔Harry同行，表示會逗留數天。

當他為醒獅綁絲帶時，他兒子就用手機在旁為他錄影。Simon又以廣東話說：「唔該晒。」他稍後會到馬場繼續出席活動，他表示自己也喜歡看賽馬，但就不懂得投注，他想到馬場感受一下氣氛，身為澳洲人的他指澳洲人和香港人一樣都喜歡賽馬。問到他是否首次來香港？他說：「係，同埋係第一次咁近距離睇舞獅，同佢哋有互動。（點解會帶埋仔仔嚟？）我想畀佢經歷多啲唔同嘅經驗，畀佢睇下我嘅工作同明白我工作上嘅責任。（有無去咗邊度玩？）我哋去咗萬佛寺，又食咗啲美食，有去飲茶，最鍾意食係叉燒，好好味。我鍾意飲茶，鍾意飲香片同姜茶，會買啲茶葉返屋企，都會揀禮物買畀太太同仔仔。香港係一個充滿活力嘅城市，好多美食，好靚，啲人好好，好fantastic，I love it。（有無欣賞香港夜景？）有坐船睇到，好靚。（你部新戲《Breath》幾時開拍？）出年4月先開始拍，依家做緊製作。（你部電視劇《心計》會唔會拍成電影？）我唔知道，唔肯定。（你仔仔好靚仔，會唔會畀佢做明星？）多謝。（畀佢參與電影拍攝？）好，我覺得可以㗎，如果佢想嘅話，我從來都唔會畀壓力佢同埋逼佢。未必一定係幕前演出，可能係參與幕後，又或者只係一個鏡頭過一過鏡，背影都得。（仔仔有無話鍾意做咩？）佢仲好細個，得14歲，需要時間畀佢去明白對生命嘅熱情，同發掘佢自己鍾意嘅嘢。（你已經有3個仔仔，會唔會再生？）要先同我太太商量。」

他又讚同是浪琴表代言人的郭富城好可愛好有才華，又笑言唔知佢最近拍拖。