灰足3萬6小時!馬國明變台慶陪跑專員?
無綫《萬千星輝頒獎典禮2015》尋晚圓滿結束,話明係頒獎典禮,自然有人歡喜有人愁,好似出爐視后胡定欣喜極而泣,仲喺台上好激動咁講得獎感受添!唔知尋晚嘅賽果啱唔啱大家嘅心水呢?
連續五年失落視帝
不過,有網友戥以真性情獲封男神嘅馬國明失落視帝而感到不值,皆因佢連續五屆有份提名視帝,但次次都與視帝寶座擦身而過,相當飲恨呀!其中,2012年佢憑劇集《On Call 36小時》被睇高一線成視帝大熱,可惜都係「只差一點點~」先可以問鼎視帝寶座,仲畀鏡頭補捉到佢當場呆咗嘅一刻,網民就解讀為佢失落獎項而嚇到呆咗,並製作短片《灰足36小時》嚟演繹佢失落嘅心情。
失獎項幸獲機會
估唔到今年馬國明繼續「灰爆」,雖然佢憑《梟雄》有份角逐視帝,但亦同獎項無緣,難怪唔少網友都話馬國明呢幾年成為「台慶陪跑專員」,仲話佢去到現場齋坐,好慘慘豬!延續番《灰足36小時》,馬國明依家係《灰足3萬6小時》!不過,有網友話馬國明失去獎項嘅同時,其實換來更多好機會,話佢艷福不淺,同唔少索爆女演員都有親熱戲。最令人印象深刻嘅,肯定係佢喺《梟》有得咀陳煒兼睇到佢嘅玉背,應驗番一句「上天係公平」架!
鍾嘉欣加入陪跑行列
其實,經常陪跑嘅人又點只佢一個,網友仲點名話鍾嘉欣都係,佢足足連續六屆有份提名視后,但都冇緣拎獎!有網友認為佢哋演技不俗,可能有時候喺劇集嘅發揮空間唔夠,或者真係差啲運氣先拎唔到獎。有網友仲鼓勵佢哋話,韋家雄捱足二十年先喺尋晚首次拎男配角,相信假以時日會輪到佢哋拎,加油呀!
網民有話兒:
XXXGB:馬國明繼《灰足36小時》,又一力作《灰足3萬6小時》!
XANAXX:馬國明可以改名做馬灰明。
山XXX人X:拎唔到獎又有咩所謂,有得同江美儀、陳煒咀嘴,抵哂(晒)啦!
CMAXXXUNG:佢(馬國明)同鍾嘉欣真係灰爆,年年都陪跑。
NAXXM:韋家雄都捱左(咗)廿年先拎到男配,睇怕佢地(哋)都要等多一排先輪到佢地(哋)拎獎。
最強娛樂APP《東網巨星》,除咗特備遊戲節目《巨星放題》外,每個禮拜都仲有好多其他精彩娛樂節目。預知未來,相信好多人都希望做到,《東網巨星》APP其中一個重點節目《玄學星相》,除咗教識大家點樣催吉避凶,仲會以玄學角度,幫大家八盡每周娛樂熱話㗎!
最強娛樂APP「東網巨星」下載連結: