入行16年的林峯，當年出道已快閃式登上無綫「首席男一」，劇集一部接一部，拍到天昏地暗，過着機械式的「峯人生活」。然而隨着林峯離開無綫，加上有位令「Chok峯」變成「愛瘋」的女友吳千語，將林峯乏味沉悶生活重新改寫，正如他所說：「遇到啱就會一齊行。」兩人「峯語」同路，走遍世界享受生活。

林峯去年正式脫離公仔箱後，工作依舊未停過，但與之前不分晝夜拍劇的生涯比較，他不禁說：「嘩！依家好開心，時間上分配好好多，當然中間都有到內地拍劇，坦白講真係搵錢嘅，但搵錢之餘都要劇本好，亦簽好晒每日拍劇時間，所以一定有足夠精神去演戲。而且內地拍劇畀我感覺係快、爽，做好自己嗰份，其他事都唔使粗心。」男人事業大於一切，但當工作蠶食生活便是時候轉變，去認識世界：「尤其近幾年，覺得生活好重要，以前生活只係工作，就算畀日假期我，我都唔知有咩做，唔識話去旅行，亦冇咁嘅動力同時間去思考。好多人會話趁後生搵多啲錢，到年紀大就唔使愁，我覺得呢個說法唔啱，到時年紀大都冇咁多精力同動力啦！嗰時點Skydiving？點潛水？冇可能啦！」

划獨木舟曬到燶

在這個大前提下，林峯現時每拍完一部劇，都會爭取去旅行叉電，「峯流快活」一下，隨行當然唔少得「BB」吳千語，與女友好好享受二人世界。他說：「我好少一個人去旅行，都係一齊去多，咁我哋鍾意嘅嘢都接近，生活方式好夾。（你同千語去過唔少地方？）咁又冇數過，但要去嘅地方仲有好多，好似北極咁遠就未有時間去。」兩人周遊列國選好目的地後，編排住宿行程就交由千語一手包辦，林峯笑說：「呢個係佢強項，我邊有佢咁好心機上網搵資料，我組織能力又冇佢咁勁，亦都冇咁嘅時間去做。」他也不介意分享與女友的快樂時光：「我會同女朋友喺湖上面溜冰，又會玩獨木舟划足七、八個鐘，曬到成個人燶晒都唔理，呢啲都係一種旅行嘅樂趣，反而我最唔鍾意旅行淨係去Shopping。」

密集式工作身心乾塘

林峯與千語走過不少繁華大地，要選擇喜歡的國家，林峯鍾情歐洲的文化及當地人的生活態度：「去到人哋地方就要跟吓人哋生活節奏同價值觀，香港人慣性好急，成日話24小時唔夠用，其實只要你肯停落嚟靜一靜，一日時間係夠用。尤其我哋演員係好需要思想空間去創作，對了解劇本同角色可以有多角度思維，睇多啲唔同嘅人同事，人都會開心咗。」

過去密集式工作，令林峯笑容都少了：「本來我係一個開心嘅人，但工作密集，我哋做緊嘅工作對自身嘅損耗，不停Output會有乾塘一日，要不停吸收新事物，盡可能吸收專業知識上嘅事豐富自己人生。其實演員要識好多嘢，包括做音樂，你真係要知道世界發生緊咩事，唔好局限自己發揮嘅可能性。」

再挑戰紅館開騷

去年林峯加盟英皇一直籌備新專輯，過去推出過不少唱片，今次阿峯貴精不貴多推出EP，精心炮製四首新歌，所花的時間卻比做一張專輯還要多，他說：「製作新歌中途要返內地拍劇，自己趁拍劇空檔揀歌。之前答應咗內地歌迷，已經有好耐時間冇出國語歌，所以今次EP裏面有兩首國語歌。」新歌來自英國及韓國作品，還請來美國外籍排舞師為MV排舞：「本來請埋佢過嚟一齊拍MV，但排舞師冇期，飛唔到過嚟，所以佢拍咗隻舞寄過嚟畀我跟住學，到時個MV完成後，我會寄番畀佢睇。」

完成新碟，下一步就是明年四月的重頭計劃─紅館開演唱會！由2009至2011年間，林峯連續3年在紅館開騷，之後2013年再開，5年4次踏上紅館舞台，創下香港歌手在紅館開騷的一個紀錄，他卻自嘲是「逼出嚟」：「演唱會唔係咁做，我唔係唔鍾意，但真係想多啲時間準備。（今次有足夠時間準備？）都係呀！之前幾次演唱會都未試過有超過一個月時間去籌備，最記得第一次紅館個唱，喺開騷前13日都仲未有Rundown，你話我係咪慌先！」將5度踏上紅館的林峯，過去已經把他「完全清袋」，所以這段日子會繼續逼自己，去看多點新事物放在舞台上。

林峯性格「一係唔做，要做就做到最好」，他希望演唱會第一場沒任何錯誤甩漏，讓自己全程Enjoy一個表演，他相信今次準備時間充裕，應可事半功倍：「暫時預計係明年一月底拍完劇，二月開始為演唱會排舞，希望到時上到台就好Enjoy！」

Chur盡谷人魚線

問到會否向場數紀錄挑戰？林峯認為場數多少交由公司決定，反而想去以前未去過的地方舉行巡唱，內地便是其中之一。過往幾次演唱會都是內地歌迷來港捧場，所以他覺得是時候回饋歌迷，但以他的人氣，巡唱豈不是要走遍全中國？他笑說：「咁咪幾好，站站停囉！公司仲鍾意呀！但我都要體能Keep好先，過往演唱會好多跳舞部分，今次都唔例外，依家要開始操體能，要舉鐵，距離自己目標仲好遠。（想練出人魚線？）人魚線唔係咁易，要榨乾晒個人，依家要顧其他工作，唔想咁快榨乾自己，但去到演唱會前會Chur盡佢。」林峯認為演唱會的重點都是在歌手身上，唱好歌、練好舞，令觀眾得到視聽享受。

期待《尋秦記》電影版

完成四月演唱會後，便是林峯向影圈發功的時候，就連老闆楊受成都心急為他安排電影工作：「老闆好想我專心做每一樣嘢，真係一位好好老闆，好多謝佢！佢畀咗好多時間我做每件事，我都想專心學習電影嘅工作，唯一知道係會開拍電影版《尋秦記》。」相隔15年，林峯這個嬴政（秦始皇）再遇古天樂這位來自現代的項少龍，這齣改編自小說的科幻古裝劇，成為無綫經典劇，亦是林峯的代表作，對於重拍搬上大銀幕，林峯非常期待：「好耐之前古天樂有搵我傾過，等埋個劇本先，係期待，咁多年我哋都有見面，但工作上就真係冇再合作過。（女主角人選？）呢個我唔知，我期待個劇本多啲。」

林峯外形煞食兼有位坐擁20億身家的富爸爸，家底雄厚，是眾人眼中的「高富帥」，但他並不認同：「我覺得唔係囉，我又唔夠1米85，邊叫高呀！（富呢？）唔夠，梗唔夠，咩叫做富先？你見我咁搏命仲要搵錢，邊係富呢？（帥又點呢？）完全唔係，從來都唔覺。（至少對千語嚟講你係帥哥？）你問吓佢，佢實話覺得我Kai（戇居）多啲，唔係帥囉！」林峯3年前無懼Fans接受與否，公開與吳千語的戀情，而最經典一幕，莫過於在傳媒面前隔空向千語連說七次「好愛」，並暱稱千語為「BB」，大家可以想像得到林峯對千語愛得多瘋狂。

「遇到啱就一齊行」

對於這麼快就為一棵樹而放棄整個森林，林峯指與千語有着「愛的脈搏」：「吓？我唔會咁諗咩為棵樹放棄森林，當你可以遇到一個心理嘅頻率係同你一樣，係好難，千語佢Inspire（激勵）到我好多嘢！（所以好值得為佢放棄其他機會？）唔好話放唔放棄，呢個係當你遇到啱就會一齊行。（令好多女仔失望？）呢個我就真係唔清楚喇！」

既然千語是不二之選，是時候結婚，但當講到結婚話題，林峯即變得慎言：「呢個簡單講一句就概括晒，我認為男人希望喺自己嘅小朋友十歲時，仲可以同佢踢波、打籃球，就係咁簡單，就係我嘅時間表。（千語有共識？）呢個你問佢啦！呢啲唔應該攞出嚟喺鏡頭前討論嘅。」