藝人陳松伶（松松）為有線高清娛樂台節目《食得有法「補」》任嘉賓，她自爆是為了主持之一石修才久休復出，再度粉墨登場，松松指自己專誠由北京返香港出席拍攝，她說：「最大原因係為咗見老友石修同李司棋，我同石修對上一次合作係十年前，當時我哋演情侶，相隔咁多年佢都仲係咁fit，我好期待下次同佢有其他方面合作，例如合唱！（合作主持養生節目？）我都有興趣，一直都有睇養生書籍，我同老公冇生小朋友，如果唔保養，將來老咗就無人照顧！」

松松駐顏有術，原來已屆女人四十之齡，她說：「呢個年紀要注意健康，以前我日飲3罐汽水，結咗婚後，老公迫我戒走唔健康嘅習慣，依家佢每日都早過我起身，放杯暖水喺床頭畀我，希望我飲多啲水，係幾細心嘅！佢啲生活習慣其實都幾『老人家』，成日督促我要注意健康，佢自己就早睡早起，朝早起身行晨運，平日打高爾夫球，佢咁健康，所以就算分隔兩地工作，我都好放心佢唔會出軌！（鍾意同老公一齊打波？）咪搞我，我咁難得先打走晒啲雀斑，如果打波曬番出嚟就大件事！」