吳業坤放毒發呆玩直播　1日吸13萬人睇

20151222
  • 東網電視
    更多新聞短片
    坤坤真係好CUTE呀！點解話佢自殘？因為佢完全唔理形象，鍾意自殘就自殘，鍾意整醜自己就整醜自己，反而令佢可愛形象更深入民心！小編都要畀心心！
    之前喺《2015勁歌金曲頒獎典禮》度勇奪新人金獎嘅歌手吳業坤，喺台度喊到眼鏡霧化兼破音，結果一喊成名，連日嚟成為萬千網民嘅焦點，個個都激讚佢真誠又Cutie！
    人氣急升嘅坤坤，尋晚突然心血來潮喺網上玩直播，仲要長達成11分鐘。
    咪以為呢11分鐘好多嘢睇，簡單嚟講除咗一啲心聲同埋有好好聽嘅新歌《感激》之外，坤坤其餘時間發咗好耐呆，保守估計有成5分鐘。無錯！係5分鐘！不過呢5分鐘，坤坤並唔係齋發呆咁簡單，佢不時舉吓V，擘大眼扮可愛，或做吓鬼臉咁，仲要做完自嘲好醜樣，嗰份傻勁真係極可愛！
    其實唔知係咪攞獎嘅興奮心情仲未平伏，坤坤每次想講嘢都係開口夾着脷咁，佢話自己喺《勁歌》漏咗多謝好多人之餘，又話：「老實講，做人好多嘅經歷，先會有...」以為佢有咩偉論啦，點知佢突然話唔知自己講咩，真係滴晒汗咯。
    之後，坤坤就送上佢首《感激》畀佢嘅FANS聽，而《東網》嘅小編真係好想HIGHLIGHT吓啲歌詞，因為坤坤除咗真係填出咗自己嘅心聲同心酸外，仲好勵志，大家就算聽過首歌，都不妨喺呢個時候重溫吓咁感人嘅歌詞。
    「總有一天 你會聽見 收音機裏
    播放着我的名字
    總會上演 不再是配角那一天
    期望過的會遇見 不需再夢見
    沿途有你共我互勉
    無論要幾多年 幾多遍
    有幾多失意或變遷 我都只會當做是磨鍊
    無論要幾多年 幾多遍
    怨天只叫人膚淺 我都是我 讓我繼續力竭高歌...」
    嘩！真係見字有淚！跟住，無聊至極嘅坤坤，狂捽自己塊臉話會減肥，然後又話好攰，搞咗一大輪，佢終於同大家講BYEBYE。
    咪以為呢個貌似BORING嘅直播冇收視，未夠一日都有成13萬次瀏覽，LIKE數仲要接近1萬，睇嚟「坤坤旋風」已經順利襲港。至於網民對於呢個直播嘅反應，大致上都係力讚坤坤可愛，仲有人留言：「識搵一定搵似坤哥嘅做男朋友」、同「睇你live突然覺得自己都好毒吓」，呢句COMMENT笑咗。