發燒22日終出院　李冰冰千字文講險死經歷

內地女星李冰冰早前於澳洲為荷里活新片開工時，連續發燒多天搞到要入醫院，最高體溫一度更燒至40.1度，住院期間佢就鬧爆護士唔識打針，搞到佢隻手流血，勁陰公！

喺澳洲醫極都醫唔好，冰冰就決定返北京醫，病足22日嘅佢今日終於出院喇，佢即時於微博公開好消息，發文表示：「發燒22天，醫生終於大手一揮宣布可以出院～～感謝大家關心！希望大伙兒都好好愛護身體，健健康康的！」佢仲上載咗以《澳囧經歷，看病也得因地制宜，點讚祖國醫護讓我滿血復活》為題嘅千字文，紀錄今次佢「劫后餘生」嘅難忘經歷。

醫生懷疑患沙士

冰冰喺文章開首就話「回想這段生病過程，像一部荒誕電影，不可思議」，佢表示自己喺11月30號開始發燒，之後體溫都處於37.5至41度，幾乎冇下降到正常溫度。喺12月14號，持續發燒嘅佢就去咗澳洲嘅醫院睇急診，但係驗埋血醫生都依然唔知到底病因係乜，「面對驗血結果，醫生不能確診到底是甚麼病因誘發持續高燒，只是覺得燒了兩周很不正常，懷疑我得非典型肺炎了」，嚇餐死！

瘋狂闖關

病都好，工作都係要做嘅，冰冰抱病都繼續拍攝，但係身邊同事見佢半個月唔退燒，就建議佢返北京醫。幾經辛苦先買到返北京嘅機票，但係發緊燒嘅人都絕對可以唔畀佢哋上機，而且冰冰喺國內睇開嘅醫生仲話唔畀佢上機，「她告訴我這麼高的體溫如果降不下來，我是不同意你上飛機的，因為很容易低血壓發生休克」。為咗令自己嘅體度下降，冰冰定時定候食退燒藥，好彩喺澳洲登機同喺香港轉機嗰陣體溫都有下降，可以順利上機嘅冰冰就話自己激動到喊咗出嚟，「這一步一步每一步跟闖關一樣，像拍電影一樣驚險」。

嚴重扁桃腺發炎含膿

一落機冰冰就直奔醫院，冰冰就話自己當時好似回光返照咁，有力氣做檢查同抽血等，「唯一的一點力量全部釋放完了，我也終於倒下了。醫生即時確診是化濃性扁桃體炎，然後確定治療方案並讓我立即住院」。

之後冰冰嘅體溫再次飆到40.1度，仲係咁打冷震，醫生都話佢病得好嚴重，不過不忘讚佢身體底子好，「靠自身免疫力能扛這麼多，一般的早倒了」。去到住院第三日，冰冰嘅體溫先開始下降，病咗咁多日，嘢又食唔到，人又攰，冰冰都覺得好辛苦，「長這麼大也沒把自己弄這麼慘過，人生第一回住院，幸好最後關頭回來了，得救了」。

最後冰冰就講自己已經得到教訓，而且都學到好多醫療知識，佢仲不忘多謝醫護人員對佢嘅照顧，「今天終於出院了，整整住了一星期，一個小病引發了一場戲劇性如拍電影般驚心動魄、跌宕起伏的求醫治病的驚險過程，最終得以劫後餘生」。

今次之後，冰冰真係要好好休養，小心身體喇！