新人歌手黃䔮晴（Milkis）到會展宣傳最新國語歌《同行旅人》和寫真集，Milkis今次寫真集的角色是一個不老的女仔：「中間會穿越咗40、60、80年代，因為轉咗好多裝扮所以好好玩，其中一個40年代妝係最誇張，化咗一個大眼妝，從未試過。」

講到其中一個取景點是石澳，Milkis直言最興奮是成功捕獲台灣男星王大陸：「我離遠見到佢拍緊嘢，真係好興奮，但因為唔想騷擾佢所以冇合到照，如果有機會真係好想同佢合作。」

Milkis表示正在籌備的第二首歌亦是國語歌：「因為我成日去台灣，所以識好多台灣朋友，公司都知我國語比較流利，所以就安排我唱國語歌先。」Milkis又講到《同行旅人》是張家誠的作品，第一次入錄音室超級緊張，不過在對方的鼓勵下都成功完成錄音，期望未來會有機會出廣東歌。問到可有其他工作想試？她直言過去曾經做模特兒，影寫真與以前的工作比較相類，希望入行後能再涉足更多不同類型的工作。