撇陳凱琳夜蒲 鄭嘉穎黐林夏薇避桃花
20151225
東網電視
更多新聞短片
撇低女友陳凱琳去夜蒲嘅鄭嘉穎冇曳曳，淨係黐實人妻林夏薇避開飛來艷福。
今年一月鄭嘉穎被《好報》影到喺中環夜蒲啜巨咪女，不過戀情見光即死，去到四月再被影到新一代女神陳凱琳去鄭嘉穎屋企相聚，揭破佢哋因為拍無綫劇集《殭》而擦出愛火花，雖然年齡相差22年，仍然無損二人之間嘅感情。
同女保持距離
去到今年年尾嘅時候，又再次見到鄭嘉穎夜蒲中環，不過今次同年頭有好大分別，撇低女友陳凱琳孖陳展鵬同林夏薇夫婦夜蒲嘅鄭嘉穎，可以用「守身如玉」嚟形容，只要有女埋身，鄭嘉穎即時彈開保持距離，絕對唔同其他女性有身體接觸，去到後段時間，鄭嘉穎身邊太多女出現，避無可避之下鄭嘉穎選擇借人妻林夏薇過橋，不斷黐住林夏薇傾偈玩電話避開啲女，結果搞到林夏薇老公莫贊生（Jason）無碇企。
林夏薇老公悶到咬煙花
之前林夏薇同老公Jason喺夜場好似孖公仔咁黐到實，林夏薇行出行入，Jason都陪住喺左右，仲不時頭貼頭自拍恩愛到爆，自從鄭嘉穎為避女借咗林夏薇過橋，Jason就好似有啲冇癮咁款，走咗去搵陳展鵬傾偈，期間見到場內有煙花，Jason突然上前攞住支煙花玩，更非常大膽用口咬住支煙花跳舞自娛，相反拍咗咁多動作片，見慣大場面嘅陳展鵬原來都有啲細膽，見到Jason咬住支煙花玩，即時閃人同Jason保持五個身位以上嘅距離。
陳展鵬同劉晨芝勁啱傾
發現Jason原來係咁「危險」，陳展鵬就閃開去搵其他人傾偈，無耐就見陳展鵬同瓣數多多嘅女歌手劉晨芝坐埋一邊傾偈，傾咗一段長時間之後，陳展鵬起身諗住走人，劉晨芝好似唔捨得咁樣，捉住陳展鵬隻手唔放拉住佢繼續傾唔停，陳展鵬都好有風度咁陪劉晨芝偈多一陣，最後陳展鵬走人時，劉晨芝依依不捨咁目送陳展鵬離開。
鄭嘉穎封口唔講陳凱琳
眾人一齊步出夜場，林夏薇同老公繼續手拖手晒恩愛，有粉絲認出陳展鵬，上前祝賀陳展鵬今年攞咗咁多獎，陳展鵬一邊多謝，仲一邊提醒粉絲唔好行咁埋避免上鏡，陳展鵬咁關心照顧人，抵你有咁多粉絲，而成晚掛住避女嘅鄭嘉穎就好似好攰咁款，問佢點解唔同陳凱琳一齊慶祝聖誕節？鄭嘉穎笑笑口冇答問題就上車走人。
最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！
最強娛樂APP「東網巨星」下載連結：