認去年中指事件闖禍　朱明銳明年初退休

新城知訊台台長朱明銳在《新城勁爆頒獎禮》後的慶功宴接受訪問，講到有傳他會離開新城，他直認：「兩個月前傾，我覺得自己喺新城有貢獻時期，喺高峰想退休，退出電台行業。眨吓眼做廣播接近四十年，其實自己有啲攰，同埋希望有啲新方向。（咩新方向？）我會抖抖，但唔抖得耐，我性格唔停得，抖一個月左右，會加盟新公司，係綜藝娛樂有關，都係我老本行，到時都係需要好多人幫手，希望媒體都支持我。」問到新公司是否給予優厚條件？他表示新城的退休條件好好，足以讓他一年不用工作，不過因為性格關係，所以希望退休後再轉投其他公司。

否認被退休

講到傳聞指他「被退休」，他即否認此說，更自爆一年前頒獎禮訪問時「中指托眼鏡」是導火線：「我早喺一年前舊年頒獎禮講咗少少嘢，覺得自己闖咗少少禍，嗰時就喺度諗，係咪應該喺自己控制到自己發展嘅情況下離開圈子呢？離開係好開心嘅，所以我頭先都冇咩激動嘅，反而我係有少少唔捨得同事。因為我2001年同新城夾到依家，我哋DJ同同事冇咩點變，大家好似一家人咁，都係公司畀我哋好好機會。」

避談是否受壓：今日同英皇正式破冰

問到去年事發後可有受到公司壓力？他即迴避問題：「冇冇冇，你哋都好有興趣寫，我同英皇關係係幾好嘅，今日可以講係正式破冰，軒仔係大贏家，雖然容祖兒冇嚟，都冇咩所謂，先頭師兄（祖兒男友劉浩龍）坐我隔籬，我都同佢講麻煩你轉達畀祖兒聽，我真係冇嬲，我係支持佢，睇番歷史，祖兒喺我任內係攞得最多嘅大贏家，所以我係好欣賞佢。」他又表示他朝到新公司，若然祖兒要開騷，都好樂意再合作。

與新城合作至生辰

朱明銳又透露會在新城留多兩、三個禮拜：「我最後一個騷係1月24日，有大騷喺會展搞，已經宣傳緊，有曹格、杜德偉、鄭欣宜、草蜢。本身冇諗過今日講退休問題，同公司協商咗一月中講，但因為有報道講咗出嚟就澄清番，合作會到我生日嗰日完結。」

問到可會有同事與他一起離開新城？他表示應該不會，因為新工與傳媒無關，又自言見到一手栽培的DJ深感驕傲：「好似我見到阿Bob（林盛斌）會好驕傲，因為佢係我一手栽培出嚟，依家獨當一面，林柏希、路芙都係。（走咗攬唔到佢哋？）唔需要有人攬，佢哋有能力。」

否認新城搬竇

他又表示新城近年經濟好好，近期亦派了花紅。問到下任台長是誰，朱明銳表示暫時無可奉告：「唔係由我決定，我決定退休後，節目一定有改動，不過唔係我決定，一定改革，一月中就會公布，依家唔可以講住。」問到有傳新城會搬到葵涌，他否認：「一定唔會啦，我哋係旗艦嚟架嗎，同埋我哋搬一個studio講緊係要成2-3千萬，入面有十個studio，點搬啊。」

與DJ合唱《友情歲月》

訪問完後，朱明銳與DJ一齊上台合唱《友情歲月》，朱明銳又對DJ們講：「大家會成日見面，好似一家人咁。」並承諾會請大家食飯，令一眾DJ超級感動，其中路芙更落淚鍚朱明銳的面，范振鋒更表示：「唔使擔心我哋已經長大。」

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

http://on.cc/redirect/entertainment