大病初愈　謝安琪去唔到水腫成個人脹晒

歌手謝安琪在《新城勁爆頒獎禮》上成為女大贏家得四個獎，她出席慶功宴接受訪問時，被問到身形豐滿不少，她就解釋是因大病初愈關係：「因為類固醇，我諗要一陣時間先可以去到水腫，但冇所謂啦，最緊要把聲好番，依家好番啦，都係自己忘形，之前白只攞獎，我嗌得好大聲，嗌到失咗聲，嗰排有少少感冒，加埋幾樣嘢啦，都病咗三個禮拜。」問及她為何今晚得獎特別感動？她說：「感觸呀，衰嘅，諗起由出道行過嗰啲片段，睇番啲片段都會好感動，好多回憶，好多要感激嘅人，要好感激幫自己走過嘅人，覺得自己都要支持自己，身邊人支持好重要啦，但我都要為自己打氣。」問是否最感激老公張繼聰？她說：「佢知㗎啦，佢明白，佢係喺我攞獎後，我第一個收到電話訊息就係佢，佢去咗美國登台，但佢抵抗到時差，收到最新嘅通知。」

為舊事澄清

問可聽聞新城知訊台台長朱明銳退休傳聞？她直言：「我都隱約聽到啲，但我唔係八卦嘅人，冇問過佢。」提到在頒獎禮台上，朱明銳提到她當年的舊唱片公司宣傳人員，指該人看不起新城而未有派歌一事，而引起一些誤會，問到她可有嬲？她為舊同事澄清說：「係少少誤會，記得當年同事係有去電台，都有派過歌，去電台唔派歌都好奇怪啦，第一年大家相處有啲小故事啦，朱明銳覺得係呢個版本，我公司同事就話其實係有派歌嘅，但當年未得到好好嘅成績，但我心裏面覺得一路有畀鼓勵我嘅，我唔會計較佢幾時開始支持我，幾時畀咗咩嘢鼓勵我，我係會記得支持過我嘅人，我都會好感謝。」

唔介意人哋有冇嚟同有冇獎攞

問到今年新城有部分歌手冇到都有獎？她就話：「其實歌手對頒獎禮都想出席嘅，我個心都係咁諗，我好難代表其他歌手，但冇工作，又喺香港，我都好喜歡出席頒獎禮，因為頒獎禮會睇到好多歌手唔同嘅階段，睇到好多人努力，睇好多人受到嘉許，其實好有激勵作用嘅，我覺得冇出席嘅歌手，個心都係支持嘅，只係有工作在身啫。」問她可支持冇到都有獎？她又話：「每個台都有佢自己嘅政治，有自己嘅做法，我覺得獎項交畀邊個歌手嘅手，每個台都有佢自己嘅甄選標準，冇得話支唔支持嘅，況且我覺得歌手得到獎又係值得嘉許嘅，我都會戥佢開心，我唔會計較我冇得去搵錢，我又嚟咗，人哋攞獎，佢有冇嚟到，我都戥佢開心囉。」

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！

最強娛樂APP「東網巨星」下載連結：

http://on.cc/redirect/entertainment