祖藍扮完程至美再扮Chok鋒 網民：笑咗
20151229
東網電視
更多新聞短片
王祖藍再獻新猷，雖然今次佢嘅外型既唔似程志美（左），亦唔似《12道鋒味》，但勝在夠神似，網民話。
藝人王祖藍一向都擅長模仿，由佢喺無綫節目《荃加福祿壽》、《Sunday扮嘢王》到佢北上發展後參加嘅內地綜藝節目《百變大咖秀》，祖藍扮過嘅人物多不勝數，好似有張學友、梁朝偉、成龍、陳奕迅、鍾景輝等。唔止扮男仔勁，祖藍對扮女人亦相當有一手，佢曾經扮過甄妮、徐小鳳、鄧紫棋（G.E.M.）、張惠妹，仲有佢自創嘅女角色「慳啲啦Baby」亦深受觀眾歡迎！
最近祖藍喺內地為一個手機app擔任代言人，為咗宣傳呢個app，祖藍每星期都會拍一段「走火入模」短片。其中一集祖藍仲拉埋好友蔡少芬（Ada）幫拖，翻拍Ada嘅經典劇集《妙手仁心》，祖藍做「程醫生」，Ada就扮演病人，不過祖藍呢個look慘被網友笑，話得副眼鏡似程醫生呀！而對白亦相當搞笑，有一幕祖藍話自己做手術從未失過手，原因竟然係因為佢未做過手術，網友留言話雖然個gag好爛，但配埋祖藍個認真樣就有笑點！
另一集，祖藍更加挑戰扮型男謝霆鋒拍《12道鋒味》，祖藍喺廚房入面學足霆鋒咁chok住教整嘢食，又大騷拋鑊技術！直到呢part祖藍都仲係好正常，但其實佢煮嘅題材非常惡搞，就係「如何烹調小鮮肉」，玩霆鋒之餘仲玩埋內地最hit嘅小鮮肉，網民都話佢創意爆棚，而且識得迎合唔同地方嘅笑點，唔怪得佢撈得咁掂！雖然每段片都只係得十分鐘左右，但祖藍模仿相當認真，絕冇揸流攤，獲網民大讚佢有誠意！
網民有話兒：
kkxxxx：祖藍扮乜似乜，唔係個樣似，係神似！
jenxxxxx：最鍾意慳啲啦Baby～
笑x：同蔡少芬一齊惡搞妙手仁心真係好搞笑，不過得副眼鏡似程醫生。
lovexxx：祖藍學霆鋒學得幾似。
堅xx：祖藍咁忙都咁畀心機扮嘢，抵讚！
最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！
最強娛樂APP「東網巨星」下載連結：