20年後再合作　啟華陶大宇鬥CHOK

藝人吳啟華、陶大宇和蘇永康晚上現身新蒲崗街頭，為鄧特希監製的新劇《隱世者們》拍外景，三人繼無綫劇《壹號皇庭V》，於近20年後再度合作。劇中，啟華與蘇康扮演秘密組織成員，並進行一些罪案的行動，飾演警察的陶大宇則負責阻止他們做犯法之事。

與啟華同為「無綫第十二期訓練班」的陶大宇，表示兩人於《壹》劇對手戲不多，好開心今次能跟對方合作：「估唔到三十年後有機會合作一套戲，好似宣萱都係好有默契嘅拍檔，應該都有好大火花。」並透露該劇乃日本和馬來西亞方面投資，有關方面很喜歡香港電視劇的文化，故劇組特地來港取景，當中也有馬來西亞與日本的演員參與，預計一共二十集。

陶大宇開鎗冇難度

問到是否有很多動作戲份？陶大宇笑謂：「我反而唔係咁多動作，會佔少少囉，啟華、呂晶晶會多啲，我頂多開下鎗，又唔需要拳頭交，我拍劇開鎗都好耐，相信難唔到我。」並謂明年一月中遠赴馬來西亞取景。

對於多年來未有機會跟陶大宇合作，啟華笑道：「可能一山不能藏二虎，我哋外形、年紀差唔多，好多時搵我就唔會搵佢，大家咁上下類型角色，所以好難撞囉。（今次鬥Chok？）冇諗呢樣嘢。」蘇康則坦言接該片的最大原因是可跟《壹》劇班底重聚：「好開心，難得可以撞到駱應鈞、宣萱，第一日開工已經話影返張相先，上一次係1996年，呢張相真係有二十年。」

啟華爆有靚女相伴

自稱扮演特工的啟華又透露有美女相伴：「今次對手好特別，佢唔係普通人，係一個複製人。（渡邊直美飾演？）唔係，佢客串下咋，其實係趙碩之，梗係搵個完美figure嘅人啦。（好性感？）性感到不得了。」雖然未知劇本有否親熱戲，但他聽聞沒有太誇張的床戲，問到有否咀嘴戲？他說：「可能有啲，佢係我戀愛對象。」

蘇康則表示劇中家人乃變臉大師，故自己也有這種特技，他笑稱：「我未開工，啟華已經打嚟，話撈埋我嗰份，因為劇情講述我扮佢，套劇所有人都扮過，個個都話撈過我嗰份。」並謂有不少動作戲份，又笑言睇得多杜琪峯的戲，對拍攝揸鎗、動作戲冇難度，又自爆劇中喜歡男人。