單親吳業坤「媽咪咁辛苦我要回報」

參加《超級巨聲2》入行的吳業坤，五年來做路人甲扮女人，去年台慶靠邊站化身為一隻零對白的「吳業棋」。今年坤坤終升格為歌手，兩首歌曲在Youtube的點撃率合共超過六百萬，並可站在舞台中央奪得勁歌頒獎禮新人金獎。當場爆喊的坤坤，人氣猶如鏡片上的霧氣，一夜之間擴散全城贏盡民望勁讚又pure又true。

冇機會「靠父幹」

今年廿五歲的坤坤正宗九十後，但不能「靠父幹」衣食無憂，坤坤的首部智能電話，也是參加《巨星》後即20歲買給自己。由於父母十多年前離婚，坤坤在中學年代已做多份兼職以減輕母親重擔。「媽咪真係好辛苦，要做好多份兼職例如清潔、家務助理之類，見媽咪咁辛苦，我中五中六開始做暑期工或partime，打蠟、保險公司、cashier等等。同學有物質享受，我唔會自卑，我叫做識諗，唔會要求媽咪啲咩。有時學校出通告叫我哋捐錢，見啲同學問阿媽攞一百，但捐就捐幾十蚊，我唔會囉。我依家係經濟之柱，屋企環境？其實都唔係好ok！我諗正常啦！貧窮線以上浮游吓。」

唔會畀家用

父母離婚，坤坤不肯說明原委，說只要父親「生生性性」就足夠，口硬和心軟之間，愛恨交纏。「因為經濟上有啲問題，所以離婚。（爸爸負債？）唔......總之就有啲意見不合啦！依家佢應該可以專心發展佢嘅事業啦，應該做返啲嘢，畀啲誠意。畀家用佢？梗係唔畀啦吓嘩！佢畀我啦係咪呀？我係佢個仔嘛！Suppose佢應該養我㗎嘛，離婚後都冇養我，係有少少（錢）返過吓嚟，但都唔會夠啦！我想同佢講：『希望你生生性性啦！畀心機啦！有機會畀你重新開始，就做好啲！要好好拚搏，趁依家冇乜負擔冇借口，唔好咩都唔做。』」

等父親氹番

一年只見到父親兩三次的坤坤，很是羨慕人家的父親和子女們有說有笑，但自己和父親的距離卻愈來愈遠，即使當年參加《巨星》選擇當歌手，也很想得到父親的認同。坤坤說：「以前係想爸爸認同，不過大家男人老狗，呢啲諗法只會擺喺心，依家都冇乜所謂，我又唔係想搏啲咩。依家佢得閒都會短訊畀我話：『我有睇到你呀！』、『要小心啲呀！』，但我真係冇乜特別感覺。反而我諗，如果佢仲喺到（未離婚），我嘅童年會更豐盛。有時見到面，都有一刻閃過想攬吓佢，但佢始終未做到一樣嘢，令我原諒佢。（點解要講原諒？）佢離開咗呢個家庭，令個家庭破碎咗，點都要做番啲嘢。好似男女朋友鬧交咁，都要氹番對方，何況咁大件事，唔可以就咁沖淡，係咪應該有番啲行動？」

我要回報阿媽

坤媽是個傳統的母親，為一對子女衣食住行安排妥貼，在坤坤眼中，坤媽是個女強人。「佢真係任勞任怨，煲湯燙衫，日日望住我出門口。佢真係幾勁，諗起都十幾年啦，我都咁大個仔，我都冇學壞，佢都幾成功。佢依家冇負擔啦，我有負擔囉，但呢個負擔我好樂意去負，媽咪咁辛苦，我都要回報番。」

車係唯一消遺

坤坤說自小養成應使就使的理財習慣，「好多嘢唔會強求，又唔會刻意儲一大舊錢買樣嘢，有錢咪買囉，每個月都要畀家用，阿媽都要買餸交雜費㗎嘛。我唔算大使，去旅行都係最近嘅地方，我都會bid平機票㗎，不過bid極都係貴咗。」現在駕約值25萬元Volkswagen出入的坤坤，說先後買下的座駕，都是朋友以特價平讓，「第一架Toyota都係六千蚊，而家呢架都係供，泊屋邨車位，暫時係最大嘅使費，但都值得，因為係我唯一消遣，我諗男人去到呢個年紀都鍾意車啦！有車，唔代表提升異性對自己嘅吸引力，對人係點先重要，即係咁講，你有架車，但你唔車人，都冇用啦！」

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

http://on.cc/redirect/entertainment