蕭正楠忙拍劇暫時唔會同黃翠如結婚

藝人蕭正楠（Edwin）在荃灣出席倒數活動，有指他出動禮物攻勢向女友黃翠如求婚成功，他笑說：「嗰啲花同蛋糕全部都係Fans送畀我嘅，我將啲禮物拎晒返屋企，咁啱就畀你哋影到，咁大個蛋糕唔想嘥，唔係咩求婚蛋糕嚟，（唔會諗結婚住？）唔會啦，大家都要忙開劇，結婚要預備好多嘢，要有好多時間準備，依家拍好啲劇先啦，（係咪2017年結婚？）唔係！我係話想40歲前結婚啫，都要人哋肯嫁畀我先得㗎，依家十畫都未有一撇。（冇諗過生B？）有時見到啲朋友好多都有小朋友，黃長興都第二個啦，都戥佢哋開心，但都要睇返自己情況，拍咗拖年幾，冇理由咁快就同人講生仔，想嚇死人咩，睇多一兩年。（會唔會未婚先有B？）唔會啦，我比較傳統，結咗婚先諗啦。」