人妻胡杏兒首度與老公過年有感而發

新婚唔夠一個星期嘅藝人胡杏兒今年除夕第一次用人妻身份同老公李承德（Philip）一齊過，身份唔同咗，感受都唔同咗！

今日一早，杏兒就喺FACEBOOK上載咗一張同Philip喺個囍字前面拎住香檳嘅合照，留言感慨過去十幾年嘅除夕倒數都要喺工作中度過，但係今年終於可以同朋友同埋屋企人一齊過，而呢個屋企人，就梗係講緊老公Philip啦！佢留言話：「2016新年快樂，過去十幾年倒數也是工作中渡（度）過，今年和朋友家人一起渡（度）過，感恩，祝大家新年進步，身體健康！」網民見到都忍唔住感性留言祝福：「你的喜悅感動了我，恭喜你找到你最佳男主角，你也是你丈夫最佳女主角，能走在一起不容易，送上衷心祝福！」

除咗胡杏兒，台灣名模隋棠亦有喺FACEBOOK上載多張同老公Tony嘅合照祝大家新年快樂！見到隋棠張張都攬到Tony實一實，其中一張仲有Tony錫錫面珠，真不愧為「撒嬌女王」！