未諗結婚　陳凱琳繼續搏殺事業

港姐陳凱琳（Grace）以「好運之星」身份出席馬場活動，她表示是參選港姐後第二次來到馬場，至於稍後會否投注？她說：「睇吓阿聰（張繼聰）玩唔玩，佢玩我就玩。（自己有冇賭運？）我冇乜賭運㗎，所以平時唔賭錢，不過平時過年同朋友玩魚蝦蟹，都覺得幾好幾輕鬆。」

她又透露自己懂得策騎，不過就因有次在橫店差點被馬踢到的經驗嚇怕了：「嗰次差啲被馬踢到，我企咗喺馬後面，隻馬又踢後腳，好彩冇乜事，所以我依家都叫人唔好企喺馬後面，當係個教訓，不過依家好少騎啦，被嗰次嚇驚咗。（你有學？）冇特別學，有係沙灘玩過吓。」

問到新一年有何目標？她說：「暫時未有劇，可以抖下先，2015年好搏殺做嘢，希望今年繼續努力，但重要係身體健康，因為之前唔識調校時間休息，唔識去瞓，搞到身體唔好。（咁人生大事呢？）冇計劃，慢慢嚟，暫時都係向事業發展方面進發，佢（男友鄭嘉穎）明白事理嘅。（視佢做結婚對象？）冇傾過呢個話題，依家拍拖好穩定好開心。」

其後談到麥玲玲指她於2016事業運很好：「我會輕鬆聽吓就算，因為我自己係基督徒，（咁嘉穎呢？）佢冇信教，但唔抗拒返教會。」