拍劇互寸鬥嘴　Bobby嘲呂慧儀眼細似蟹

藝人歐陽震華（Bobby）、滕麗名（阿滕）、張頴康及呂慧儀等於機場酒店，拍攝無綫劇集《一屋老友記》。

鬥寸輸咗請食飯

清減不少的Bobby稱開工會自動減磅，又表示開工開心到似去遊樂場。他透露眾演員於戲中不時互寸鬥嘴，而招架不住的人就要請食飯。自稱從未因此請人食飯的Bobby提到同劇的「長腳蟹」呂慧儀時，笑指對方眼仔細細，似足隻蟹：「愈睇佢愈似隻蟹，眼仔細細，份人笑點低又易氹。」Bobby提到誤飲對方的通經水一幕，大讚慧儀成功忍笑一take過，他說：「本身佢唔肯畀我噴水，但我鼓勵佢做，觀眾會加分，況且我冇口臭，用晒蒜頭消毒，結果佢畀我噴到頭髮都濕埋，一take ok！」

睇住滕麗名長大

講到Bobby與舊拍檔滕麗名久別再合作，他即搞笑稱看到對方發育及當上人妻，更講有味笑話：「睇住佢發育同做人妻。（點睇佢發育？）佢做豐胸代言人，用手按摩豐胸，佢連隻手都大成個碼，佢老公（幫佢）隻手大兩個碼添呀！」

當Bobby係哥哥

至於阿滕聞言就笑稱早已把Bobby當作哥哥，但又「出口術」反擊對方：「我問番佢印度神油搽手指又會點？結果佢輸咗畀我啦！」