介意被指靠「後台」 林峯寧願唔要獎

20160102
東網電視
更多新聞短片
林峯(右圖左)坦言唔想畀人覺得攞獎靠後台,所以曾要求頒獎單位唔好頒獎畀佢!
藝人林峯在電台錄音訪問中暢談入行的種種點滴,入行後即被無綫力捧的林峯,前年毅然離開工作了15年的「娘家」,他說:「坦白講喺真係決定要離開前,我已考慮咗兩、三年,做電視圈多年,有好多劇集嘅題材都開始重覆,自己可以駕馭嘅角色都試過,漸漸喺心中就冇咗嗰團火。所以離開主要係希望工作上有突破,都希望吸收更多電視圈未必能畀到我嘅閱歷去助我將來演戲。(離開後想專注唱歌嗎?)唱歌係我從小到大嘅夢想,喺電視圈忙住拍劇真係好難去一直兼顧歌影視三方面。除咗音樂上嘅發展外,我都想喺電影上有更多嘗試!(離開無綫最後一日有唔捨得嗎?)冇,因為呢個唔係一剎那嘅決定,反而我會覺得離開後我要表現得更好,而且依家能遇上咁多支持同了解我嘅老闆真係好難得,所以真係冇唔捨得!」
冇否認一億簽英皇
有傳林峯離開無綫後,黃百鳴及黃柏高也先後跟他接觸,他剖白選擇簽約英皇的因由:「我同黃百鳴、Paco(黃柏高)認識咗好耐,佢哋知道我要咩。除咗電影外,我一定要做音樂,香港真係好少大企業有咁樣資源可以兼做呢兩件事,所以選擇真係唔多。」談到最後選擇簽約英皇,曾有傳英皇今次以一億天價邀他加盟,林峯沒否認說:「當然會考慮錢!老實講,咁努力做嘢都係為咗賺更多錢!古仔(古天樂)好耐之前都同我講以價錢作考慮可以畀自己更易衡量工作、更有動力去做。英皇畀到我同時兼做歌及影兩個範疇外,即使從前我唔係全約(藝人),英皇啲同事已對我好好、好支持我;我覺得最重要係公司可以畀到我歸屬感,同事又好全心全意為我做嘢,我好慶幸依家搵到呢份歸屬感。」
怕被指唔係實至名歸
出道後,林峯的富裕家境一直是傳媒報道的焦點,更因此被標籤有「後台」。林峯直言曾介意這些流言蜚語:「我曾要求頒獎單位唔好頒獎畀我,人人都覺得我有『後台』先攞到獎,我自己得獎心裏都唔舒服;有一次我攞獎後企喺布景板前兩分鐘都講唔出嘢,當時我心裏唔停咁諗人哋會講咩,我唔希望人哋覺得我唔係實至名歸!」
獲父母支持
問到是否認為因為有個「富爸爸」所以被標籤?林峯則謂:「其實唔係大家所諗咁樣,出道至今,除咗第一年經濟靠自己平衡唔到,所以爸爸經濟上支持過我之外,第二年起我已經可以賺錢畀爸爸!(咁爸爸有畀你一個時限喺娛樂圈發展嗎?)象徵式都有嘅,大概2至3年!不過我份人好有趣,你愈係唔畀我做,我愈要做,不過父母見我做得唔錯,依家又好支持我!(爸爸有要求你接手家族生意嗎?)冇,絕對冇畀我壓力,好慶幸我父母好開通。」