網民熱話：蘇民峰批中吳業坤26歲走紅

近排爆紅嘅吳業坤繼早前於《勁歌金曲頒獎典禮》勇奪「最受歡迎新人獎（金獎）」後，再於《叱咤樂壇流行榜頒獎典禮》中連掃「我最喜愛的男歌手」、「我最喜愛的歌曲大獎」及「生力軍金獎」三個獎項，成為首個以新力軍奪得「我最喜愛的男歌手」嘅佢，雖然冇再次喊到出霧，但個樣就勁呆好似就暈咁！多番感言更成為當晚亮點！隨後更有多位歌手、歌迷及網絡紅人於網上集體洗版，唔少網民就因翻睇坤坤舊聞時，赫然發現佢喺2011年上堪輿學家蘇民峰節目《民峰學院》時已被師傅批中26歲會走紅，更成功預測佢將與年紀比佢大嘅女伴結緣?！

26歲至31歲有短期高峰運

現年25歲（虛齡26歲）嘅坤坤，入行五年一直發展平平，曾經只係隻「棋」嘅佢今年終於冒出頭來，唔止喺樂壇創下佳績，仲因劇集《愛．回家》吸納咗唔少粉絲！成功喺演藝事業創出高峰嘅佢，原來早喺2011年前已被蘇師傅預測佢將於26至31歲期間會行個「短期個人高峰運」，睇嚟坤坤喺嚟緊呢一年會愈撈愈掂噃！

情緒易激動易有問題

雖說坤坤係個新人，但喊到眼鏡出霧又扯晒蝦，甚至動L又真係百年難得一見！當年蘇師傅睇佢面相時，已經再三強調坤坤眼神唔夠堅定，咁樣情緒會易激動，易有問題，不過其後師傅又指眼神可以變，可以慢慢練，叫坤坤唔使太擔心！

認識比佢年紀大嘅女伴

被網民鬧爆「偽毒可恥」嘅坤坤，先後與組合Super Girls隊長Aka、周秀娜、吳若希及鄧佩儀等藝人傳出緋聞，艷福不淺！於節目中主動向蘇師傅提問未來伴侶嘅佢，仲大爆媽咪唔多鍾意佢發展「姊弟戀」：「我阿媽成日都叫我唔好揀啲大過我！」但蘇師傅就話坤坤「眉粗嫁大妻」，直言睇佢面相、命格都好大機會同年紀大過佢嘅女伴結緣，而坤坤今年又與大佢一年嘅龔嘉欣傳出「姐弟情」噃，唔少網民亦留言指：「年紀大女伴…咁依家佢同龔嘉欣姐弟戀都啱喎！」

網民有話兒：

pallxxxx：又幾準喎！邊估到佢一爆喊即紅！

lcxc1999：年紀大女伴…咁依家佢同龔嘉欣姐弟戀都岩（啱）喎！

肩哥xx：之前佢係巨星比（畀）人轉造型個（嗰）陣，stylist仲建議佢戴con，好在佢堅持帶（戴）返（番）副眼鏡，先有今日！哈哈哈～

xx鳴偉：《民峰學院》遲啲又多幾班學生～～

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

http://on.cc/redirect/entertainment