獲邀做Twins嘉賓 SG擔心變廁所位

20160103
東網電視
更多新聞短片
Super Girls希望自己好似Twins一樣,去到15周年。
Super Girls(SG)昨晚擔任Twins紅館演唱會嘉賓,成員Yanny接受《東網》電話訪問時頻話好開心好緊張,說:「因為第一次做紅館演唱會嘅表演嘉賓,尤其做Twins嘅嘉賓,佢哋係組合嘅大師姐,啱啱先發現我哋要同As One(另一隊女子組合)要一齊跳舞,所以要學咗5至10分鐘舞,身為女子組合見證到成場人睇住我哋表演真係好感動,我哋成日講幾時到我哋。」另一成員Cheronna則表示:「都有壓力㗎,因為人哋可能覺得我哋唔及佢哋(Twins),覺得我哋唔好睇,我哋嗰段時間係去廁所位,但原來唔係囉,現場好咗好多反應我哋,Twins喺台上都同現場觀眾講要錫我哋好似錫Twins一樣,佢哋好支持我哋。」
至於Jessica則說:「每次上大台都好感動,Twins以香港女子組合介紹我哋,叫大家畀多啲支持,嗰時我哋喺後台聽到眼濕濕,令我哋諗番起啲辛酸嘢,冇諗過以前讀書時用好多錢去買Twins嘅CD,可以做偶像嘅演唱會嘉賓真係不可思議,係好榮幸嘅事,係2016年最好嘅禮物。」Heidi自認是Twins Fans並感謝Twins,說:「佢哋好提攜後輩,好錫我哋,啲能量好好,所以好感激Twins畀呢次機會我哋。」最後Aka則謂:「真係好似發緊夢咁,就算表演完之後,因為平時我哋喺電視或網上先見到佢哋(Twins),覺得好難接觸佢哋,但今次竟然可以做佢哋嘉賓,佢哋係一個活生生嘅例子,話畀我哋聽,佢哋係好經典嘅女子組合,佢哋講得啱,女子組合真係唔容易做,同埋我哋係五個,所有嘢都盡量去磨合,要好有默契先得,Twins係一個好好嘅榜樣同目標,希望我哋都好似Twins去到15周年。」