娛樂專題：姚子羚事業．婚姻平行發展

姚子羚（Elaine）入行13年，多次與獎項擦身而過，直到最近雙喜臨門，在《萬千星輝頒獎典禮》中首奪「最佳女配角」，是繼早前在《TVB馬來西亞星光薈萃頒獎典禮2015》中奪得「最喜愛TVB女配角」後再獲殊榮！事業穩步上揚，那婚姻呢？多次被傳向男友「逼婚」的她說：「婚姻對女人嚟講固然重要，但事業先能夠證明一個女人真正嘅價值！」

半熟宣言：有自己想法最吸引男人

現年35歲的姚子羚早已踏入輕熟女階段，曾多次被傳向身家豐厚、外號「的士邦」的車行太子爺男友鄭子邦「逼婚」，正當大家都認定她「恨嫁」時，原來她對婚姻有另一套睇法：「坦白講，其實已經過咗（想結婚）嗰個時候。（以前會諗？）好耐之前會嘅，但係慢慢就冇諗呢樣嘢，因為我會想做好我嘅工作，其實我深信所有嘢都係一個Package嚟，當有一樣嘢你行得好順嘅時候，其他嘢都會嚟！而且事業係代表你自己，我相信我將來嘅另一半，都唔會希望伴侶每一日淨係掛住拍拖拍拖同拍拖，應該要有自己嘅生活、自己嘅路、自己嘅諗法。我諗呢個先係一個女人最吸引男人嘅地方。」

結婚計劃一切隨緣

雖然一早已到適婚年齡，但Elaine直言不會為嫁而Set Timer：「我唔主張因為要結婚，而去搵一個人結婚，應該係去搵一個適合結婚嘅人去結婚，係兩個好唔同嘅嘢嚟。我覺得感情嘅嘢好奇妙，事業嘅嘢你可以掌握喺手，但係感情事唔係一個人可以掌握到，唔係你個Planning（計劃）想咁行，你就可以咁行。可能你想30歲，佢想40歲呢，咁已經唔同喇喎！唔通你又要去搵過另一個人同你步伐一致？所以我唔會用呢樣嘢嚟畀一個框框自己。（想唔想有小朋友？）我都想有小朋友，因為我都鍾意，但係我覺得隨心，要嚟嘅時候就嚟！同埋我見到好似豹哥（單立文）、豹嫂（胡蓓蔚）咁，冇小朋友一樣好Sweet、好開心，所以其實有定冇都可以好開心。」

「兩個人相處需要好大學問」

既然要找到一位適合結婚的人才去想結婚，那麼現任男友是否那位合適的人選？她甜笑說：「咁佢......都係嘅，如果佢唔係，大家就唔會繼續行落去啦！當然兩個人相處係需要好大嘅學問，亦都需要時間去學習，大家要用好多愛去Support，去包容大家。現階段係開心嘅！我覺得依家同以前追求嘅嘢唔一樣，你要嘅唔再係小朋友嗰時一剎那嘅刺激，而係一啲心靈上同精神上嘅嘢，大家都Stable嘅嘢。」

除了豹嫂外，胡杏兒亦將成為「胡說八道會」另一位人妻，到底誰會「搶閘」成為再下一個？Elaine笑言黃智雯分分鐘是下一個：「真係好難估喎！其實大家有冇諗住開個盤呢？哈哈！橫掂《東網》早前都民選緊視后同視帝，咁不如大家開個盤選一選！（你揀一個先！）個個都好有機喎！我估會係智雯啦！唔知點解呢！但係我覺得智雯好家嫂Feel呀！（定欣呢？）定欣都好大機會，但係定欣其實事業心重嘅，不過我諗定欣都想嘅，佢唔係唔想，不過如果你要我揀就智雯囉！佢成日都甜絲絲，咁我估係佢啩，我唔知呀！」

認定目標努力前進

2002年在《TVB8全能主持比賽》中奪得冠軍而入行的Elaine，翌年參演《當四葉草碰上劍尖時》而為人熟悉，轉眼間已入行13年，一直再沒機會與獎項重逢。直到今年，她終在馬來西亞榮獲人生第一個女配角獎，會否太遲？她直言「Never Too Late」：「我一直好踏實咁去行呢段路，雖然可能有啲人會覺得『會唔會遲咗啲』，但我覺得永遠都唔會遲，我依然向緊自己想行嘅目標進發。其實最開心係見到觀眾留言同我講『子羚我見到你進步緊』，甚至同我講『子羚我以前唔鍾意你，但係我依家愈來愈鍾意你』，呢一樣嘢令我最感動，因為只要你努力，人哋就會知，人哋係會感受到！」

對於在馬來西亞先拔頭籌，繼而在《萬千星輝頒獎典禮》中首奪「最佳女配角」，雙喜臨門的她感觸又感恩，但依然未忘好姊妹胡定欣：「最開心係見到定欣攞視后，因為呢個係咁多年嚟大家一齊成長嘅經歷，我見到佢一步一步行到視后，好替佢開心！」對於現今花旦有流失現象，不少藝人都選擇向外闖，Elaine有一番見解：「每個人都有佢想行嘅道路，唔同時間會有唔同機遇，我反而覺得依家係一個好好嘅時候，自己或者可以有機會更上一層樓！」

笑看批評

一路走來，無論在演藝路上或感情生活上，Elaine都面對過不少批評，「花瓶」、「演技浮誇」、「拜金」、「逼婚」等統統出現過，對於惡性批評，她一律照單全收，將批評轉化為成長的養分，可讓自己變得更加成熟，她說：「啱啱入行嘅時候當然一定會有唔開心，但係當你慢慢成長，我唔可以話係成功，因為成功其實係永無止境，所以應該話係成長，我會覺得如果想變得更加好，你就要接受批評，人哋話你一定有原因，學會放下自己，去嘗試接受唔同嘅聲音，無論係讚美嘅聲音定係批評嘅聲音。我覺得無論演戲又好，做人處事又好，都係一個經歷，你過到，只會變得更加好，所以我慢慢學識將佢轉化為一種力量！」

在現今網絡主宰娛樂圈的時代，面對討論區充斥着大量嘲笑意味的改圖及二次創作，身為一個女孩子難免會感到難堪，但Elaine輕鬆淡言：「當係玩吓囉！娛樂圈就係要娛樂人嘛！我又唔會放喺心上，人哋講啲咩、做啲咩你控制唔到，我咪向好嗰邊諗囉！原來大家有留意姚子羚呢個人喎！」

後記：知性女子外冷內熱

鏡頭前的Elaine向來給人慢熱、內斂的感覺，但當談到工作或感情生活時，她都表現得輕鬆自在，侃侃而談：「女人應該要有自己嘅生活、自己嘅路、自己嘅諗法。」將時代女性獨立一面充分展現。在過去的13年，她雖未有在事業上打造出一張輝煌的成績表，卻造就了今天成熟知性的姚子羚！