李蘊半年前已註冊 暗示雙喜臨門！
20160104
東網電視
更多新聞短片
李蘊呻老公求婚過程簡單，冇心思！
24歲嘅藝人李蘊同內地金融才俊男友羅章冠尋晚喺海南擺酒，超級突然，如果唔係好友G.E.M.（鄧紫棋）同何超蓮放相上社交網站，都可能冇人知。
趕好日擺酒
今日《東網》致電李蘊時，新娘子就難掩喜悅，全程笑晒，佢透露喺上年6月8號求婚幾日已經喺廣州註咗冊，佢講笑話：「過程一啲特別都冇呀，有戒指嘅，可能佢覺得我嫁硬佢，所以冇心思啩！」佢直言自己本身唔急擺酒，但屋企人喺上幾個星期就話1月3號係超級大好日，先至決定擺酒，所以得幾星期籌備，勁趕！佢自己都話：「有網友話我婚紗唔啱身，因為太趕冇時間訂造，只可以買。」而好姊妹G.E.M.同超蓮就有特登同佢襯過啲衫，買番白色嘅，不過因為太趕佢哋帶唔切禮物嚟，但係就聲稱準備咗神秘禮物。
婚後即造人
問到點解去海南擺酒，李蘊就話因為老公係海南人，所以特登去拜祠堂，祭祖嗰陣都擺咗40圍，好熱鬧，而婚宴就擺咗30圍，圈中人就淨係請咗G.E.M.同超蓮，其他都係屋企人。
曾講過話想30歲結婚生仔嘅李蘊，就話自己已經準備好造人，問到尋晚係咪已經開始努力，佢就話太攰，洗咗頭就瞓咗。問到係咪雙喜臨門，佢就好隱晦話有消息會通知大家；問到會唔會喺香港補擺喜酒，佢就話會嘅，不過唔會咁快。
最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！
最強娛樂APP「東網巨星」下載連結：