麥浚龍自爆貪心想同謝安琪今年再合作

歌手謝安琪（Kay）和麥浚龍（Juno）在「十大中文金曲頒獎禮」上憑合唱歌《羅生門》奪得「全球華人至尊金曲獎」，Juno坦言覺得好開心，覺得2015好圓滿，他透露因一個電話，便釀成了《羅生門》這首歌：「到今日得獎，我哋已經變咗唔係淨係講歌，而係變成朋友，認識咗一個真心朋友係最圓滿嘅事。（上次叱咤失落「我最喜愛的歌曲」，今次吐氣揚眉？）都係抱住一個開心狀態出席頒獎禮，每個台嘅準則唔同，好多嘢唔同，無話唔開心，今日攞呢個獎唔係我一個人功勞，係一team人功勞。（咁成功會否再有合作？）當然會，呢個我已經諗過，但未邀請住，我未認識阿Kay已經覺得佢係好爽快嘅人，合作咗覺得佢係好善良、好好嘅人，今次嘅合作係好開心，可能會衍生第二啲合作出嚟。」問到可會是《羅生門》續集？他笑言可能是《羅終門》。

露口風今年再合作

而Kay亦表示其實很想同Juno約定10年後再做一個合作：「幾有意思，今次係幾美麗嘅緣份，我地原本結識咗，但未去到有做好朋友嘅緣份，今次合作係最圓滿收穫，讓人生識咗個好朋友，將呢段友誼最好延續落去就係10年後我地呢個故事點樣，做一個特別啲合作，唔知做咩，10年後我又變咗做咩樣，或者再肥啲我都唔知。」而Juno則謂：「我就貪心啲，我唔想淨係10年先合作，同埋今年都會出碟。」

改變飲食習慣體重上升

而講到今日Kay以較鬆身衫打扮現身，她表示：「啲衫一早預備好，我無乜理體重，我都想同喜歡我啲朋友講，如果喜歡一個歌手，佢對於體重係好隨意，最緊要係健康，做緊自己最快樂的事，唔需要受呢啲大眾標準去束縛、或者有壓力，大家應該以健康為目標，唔好過度節食，我都想咁，歷史上我都曾經好多次好肥咁上台表演嘅，我自己覺得幾自豪，一個紀錄。（大家唔係話你肥，話你有咗？）冇冇冇，你估『羅生子』咩依家？（好似有啲腫！）我真係肥咗，我不嬲都唔食肉類嘅，但依家直頭食得好清，連蛋、牛奶呢啲由動物農場產生嘅產品都唔食，變咗我選擇少咗，暫時我未識得點樣適應，食多咗好多飯，白飯、麵，食好多澱粉質先飽，係一個轉接期，我都約咗營養師睇下點樣均衡飲食，我個重點都係想健康啫。（你身型真係似有咗？）我真係無BB嘅。（有無咩唔舒服？）無，好精神，我多謝大家關心。」

肉色打底扮走光

談到她之後會放長假，她表示做完演唱會之後會放假：「因為我成日話做音樂好辛苦，尤其是依家係自己公司，一條小船，兼顧啲嘢好多，所以係時候放一個假充電，同埋計劃一下之後點樣行，想做啲乜嘢，畀自己多啲時間體驗一下生活先。（計劃包唔包括真係生B？）我又無排除呢個可能性，但呢個唔係嗰個原因，但我真係好勤力，成為歌手十年來，冇放過長假，冇放超過5日假期，新年放初一至初五已覺得好罪疚，好想投入工作。（咁放幾耐？）不定，但我4月做演唱會，做完演唱會先，又點會依家無端端『羅生子』呢？係唔可能。」而講到她台上落樓梯時險些走光，她笑言：「係咩？唔係，係肉色打底，用嚟呃大家嘅！」