宣萱助養中老年狗狗：有過經歷懂得珍惜

藝人宣萱帶同四隻狗狗出席保護遺棄動物協會（SAA）活動，她表示其中三隻狗狗是自己的，另一隻是屬於其兄長：「因為我阿哥去咗旅行，所以就暫時寄養喺我屋企，我屋企係狗酒店。」

她透露SAA有新計劃，鼓勵大家領養中老年犬隻，並成立基金支助醫療費。宣萱又透露她其中一隻狗也是六歲時才被領養：「希望畀到狗狗餘生幾年安樂嘅生活，年輕嘅狗始終係多啲人收養，覺得易啲教，但其實冇分別，我隻狗六歲嚟到我屋企時，都好快學識去廁所。」

宣萱稱現有三狗兩貓，高峰期試過養有六隻狗，覺得十分難控制：「以前六隻狗成日打交，因為佢哋一出世就喺我屋企未捱過，所以少少事就嘈交，但呢三隻狗都係流浪狗有過經歷，所以好懂得珍惜，相處得好好。但如果有緊急情況，我都可以再養多一隻狗嘅。」