娛樂專題:蔡潔事業搏殺無心「戀」戰

20160111
東網電視
更多新聞短片
每一次拍攝都是一種學習,所以蔡潔話會把握每一次機會。
蔡潔曾參加華裔小姐選舉,她透露當時因為壓力爆煲而暴瘦,未能當選亦輸得心服口服!而事業心重的她暫時無意發展戀情,不過卻慘被母親笑她年紀老,更曾為她安排相睇識男仔!
蔡潔(Jacky)首次參演電影就能與影帝級前輩曾志偉有對手戲,並入圍第34屆香港電影金像獎最佳新演員,對她來說可謂雙倍收穫!是次拍攝經驗讓她從一眾前輩身上獲益良多,足以令她一世難忘:「我會觀察佢哋點樣做戲,揣摩角色方面嘅嘢,除此之外,見到佢哋有種態度,其實學做事先要學做人,每一個圈子都係,一個成功嘅人,一定係喺待人接物方面有自己一套好周全、好得體嘅處事方式,呢一點我係要慢慢學習嘅!」
選華姐輸得心服
在參演電影之前,Jacky曾在澳洲參加不同類型的比賽,自認貪玩的她坦言喜歡透過比賽認識朋友,其中一個最令她印象深刻的經驗必定是參選華裔小姐:「我參加咗一個歌唱比賽之後,TVB就問我不如參加埋年底嘅華裔小姐,都好好玩,可能有機會唱歌,其實我冇諗太多就去,不過好老實講,當我代表Melbourne(墨爾本)嚟香港嘅時候,真係好想爭取好成績,去為Melbourne爭光!」最後未能入選三甲,Jacky坦言的確會失望,但能令她作出反思:「後尾我睇番一啲片段,覺得自己當時太瘦,可能因為壓力大,就有少少厭食症嗰種效果出咗嚟,睇番就覺得好合理,所以我得出一個結論,就係一個女仔唔需要拚命去為減肥而減肥,健康先係最緊要!」
逼到自己壓力爆煲
講到當初的壓力來源,她表示上台時總希望將最好的一面呈現出來,所以不時會想着如何可以準備得更好:「諗吓諗吓就會冇精神去準備、食嘢、瞓覺,嚟香港準備都係十日左右,十日間我瘦咗好多,好多女仔都係,因為排練嘅時間好緊迫。」而摩羯座的Jacky坦言最大的壓力,其實是源於自己:「摩羯座係比較鍾意逼自己嘅星座,我知道有啲嘢唔可以一步登天,但係成日都想自己做得更好,其實有時咁樣反而係反效果,所以心態上嘅調整我係要慢慢學習!」她又自覺非常幸運,因為入行後得到很多同事與前輩給予很好的意見。
相睇飯局尷尬?完鬆
不少藝人為了專心發展銀色事業,不惜將感情生活排放到最後,事業剛起步的Jacky認為現時不是拍拖的好時機,因為擔心沒有時間和心機擺放到戀情中,會白白浪費了一段美好姻緣,不過她笑言家人卻為她的感情生活非常焦急:「媽咪話我已經好老喇!佢話佢咁嘅年紀已經生咗我喇!屋企人緊張其實好正常,但我哋都明白有啲嘢唔急得,緣分嚟嘅時候就自然會嚟!」她又透露曾獲母親安排過一次相睇,但她認為這類型的相識不太適合開展一段感情:「係我媽咪朋友個仔,我哋就一齊食飯,嗰個飯局上氣氛實在有少少尷尬,我都估到喇!然後大家冇咩咁交咗個朋友、散咗之後,媽咪就話唔係特登,只係咁啱撞到,睇吓我哋啱唔啱,我就話得喇,我唔會怪你,但你以後唔使再咁喇!」
問到她的擇偶條件?Jacky坦言心中沒有真正的標準:「我媽咪成日都會話:『你冇標準咁咪仲難搵,樣樣都唔啱!』其實我覺得最緊要夾,價值觀上係相近嘅,同埋我都係一個事業心比較重嘅人,可能做我男友就要委屈啲,比較多時間要就番我,除此之外,當然要孝順我父母!」