林峯Chok入港鐵　唔識嘟飛入閘

歌手林峯將於4月29日至5月1日第五度登上紅館，舉行《瑞士依波路表160週年呈獻 Heart Attack林峯演唱會》，為此英皇特意豪擲逾7位數字金額進行一連串宣傳，除了買下紅隧入口的大型廣告牌外，更在港、九、新界沿線港鐵站買下約200塊廣告牌。而平時以私家車代步的林峯今日微服出巡，快閃殺入旺角、金鐘及中環港鐵站巡視演唱會廣告牌，期間更一度引來近百途人圍觀，場面墟冚！

「乜依家啲飛厚咗咁多」

約下午四時，乘搭保母車的林峯來到人多擠迫的旺角，之後他行到港鐵站，途人即刻聞「峯」而至，難得看到林峯平民化搭港鐵，眾人紛紛舉機狂拍。之後林峯掏錢買車票，買完更一度忘記拿零錢，十分搞笑，更笑言：「乜依家啲飛厚咗咁多！」到入閘時，很久沒有搭港鐵的林峯搞笑地不知道新款單程票可以嘟卡，還以為可以插卡，埸面搞笑！之後他行去月台等車，途人見狀立即喪跟兼影相，最高峰時更引來近百男女老幼途人圍觀。接着他乘車前往金鐘，途人亦跟在一起，人多到迫爆成卡車廂。

做完黃大仙變大鄉里

乘車期間林峯化身「有求必應黃大仙」，不停跟粉絲自拍和傾偈，十分親民，又擺出Chok樣和Cute樣，氹得粉絲十分開心，期間林峯還拿起工作人員相機反拍粉絲，十分調皮。細心的林峯，又提醒大家不要只顧影相，小心跌倒。然後林峯乘車到中環，出閘時他再次化身「大鄉里」，繼續猶豫不知應否嘟卡還是插卡，場面惹笑。

五年冇搭港鐵

林峯受訪時表示以前返學放學會搭港鐵，但對上一次搭港鐵已是起碼5年前的事，講到今次再搭，他自嘲是「大鄉里出城」：「唔知新地鐵（港鐵）飛原來可以嘟，仲以為點解冇位入！同埋發覺通風系統好咗，亦多咗好多嘢食舖頭。今次同fans近距離接觸好開心同好突然，不過我會留更多近距離接觸畀演唱會入場嘅所有朋友。（好似頭先咁近？）可能會近好多，買飛入場仲唔近啲？每年都希望可以同fans嘅距離愈拉愈近。」

自爆鍾意行街市

對於在短短45分鐘內反轉旺角、金鐘及中環，更被多人圍觀，他坦言沒有被嚇窒：「大家都守秩序。（以後搭多啲港鐵？）不嬲想搭多啲公共交通工具，但只係工作安排唔方便，其實自己都鍾意周圍行街，都會行街市，好多街坊都見到我。（邊到可以野生捕獲你？）港島區比較多出現，因為由細到大住港島，九龍唔多熟路。（下次再搞快閃？）都幾好，自己都鍾意生活化嘅嘢，唔係淨係銀幕或台上先可以見到我哋，可以同大家拉近啲距離，當街坊咁樣。」他亦表示演唱會剛開始接受信用卡優先訂票：「情況聽講都賣得唔錯，多謝大家支持，希望嚟緊可以同大家多啲見面。」

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

http://on.cc/redirect/entertainment