暗示有拖拍？陳展鵬恨愛：可能出現咗呢

藝人陳展鵬、劉佩玥、陳爽及湛琪清等，出席「東港城3D打印藝術萬花園」揭幕活動。而新鴻基地產代理有限公司租務部總經理鍾秀蓮亦現身剪綵儀式作支持。

昨日39歲牛一的展鵬於活動上獲粉絲送上蛋糕及鮮花，以補祝生日。他於受訪時透露正日生日於工作中渡過，更獲拍檔馬國明及唐詩詠等為他慶祝。談到生日願望，展鵬希望家人身體健康及搵到好角色去出演。問他何不搵個女友？展鵬就大賣關子「恨」求愛：「可能已經出現咗呢。（有女友？點解唔學鄭嘉穎咁公布戀情？）唔知，未正式講，我都想公開。（有壓力唔公開？）你指公司阻人拍拖？唔興啦！拍拖仲旺呀！我新年同情人節會去美國登台，到時難得有艷遇咪留耐啲，冇就要返港！」

談到有指展鵬將與馬國明合演無綫新劇《乘勝追擊》（暫名），而馬國明將任男主角力壓展鵬？展鵬大方說：「我唔知，未開拍。但馬國明做男一好應該，佢本身都係男一！佢訓練班時已經相識，但未正式合作一套劇。（若到時戲份比對方少？）冇所謂，好似我拍《巨輪II》都係客串。只要唔係套套客串，否則變串星。觀眾鍾意睇就得。」